Monday, January 7, 2013

കള്ളന്‍ പത്രോസ് സ്വാമി

ഇതു ഞങ്ങളുടെ അയല്‍നാട്ടില്‍ നടന്ന സംഭവമാണ്. ഏതൊരു നാട്ടിലും എന്ന പോലെ ആ നാട്ടിലുമുണ്ടായിരുന്നു ഒരു കൊച്ചു കള്ളന്‍. പേര് പത്രോസ് (യഥാര്‍ത്ഥ പേരല്ല). കള്ളന്‍ എന്നു വച്ചാല്‍ ജഗജില്ലിയായ പെരുങ്കള്ളനൊന്നുമല്ല, ഒരു പാവം സാധാ കള്ളന്‍. അതായതു വിയര്‍പ്പിന്റെ അസുഖമുള്ളതു കൊണ്ട് പണിയെടുക്കാന്‍ മടിച്ച് കൊച്ചു കൊച്ചു മോഷണങ്ങളുമായി ജീവിയ്ക്കുന്ന ഒരു കുഞ്ഞു കള്ളന്‍. മീശമാധവന്‍ എന്ന ചിത്രത്തിലെ ദിലീപിനെ പോലെ ആ നാടിന്റെ സ്വന്തം കള്ളന്‍.

പക്ഷേ, അവിടെയും വ്യത്യാസമെന്തെന്നാല്‍ പത്രോസ് ഒരിയ്ക്കലും വലിയ വലിയ മോഷണങ്ങള്‍ക്ക് പോകാറില്ല. വീടോ കടയോ മറ്റോ കുത്തിത്തുറക്കാനോ ഓട് പൊളിച്ച് അകത്തു കയറാനോ ആള്‍ക്കാരെ ഉപദ്രവിച്ച് സ്വര്‍ണ്ണവും മറ്റും മോഷ്ടിയ്ക്കാനോ ഒന്നും പത്രോസ് മുതിരാറില്ല. പകരം ആരെങ്കിലുമൊക്കെ രാത്രി കാലങ്ങളില്‍ മുറ്റത്തു ബാക്കി വച്ചിട്ടു പോകുന്ന ചെറിയ ചെമ്പുകള്‍, കിണ്ടികള്‍, കിണ്ണങ്ങള്‍ അങ്ങനെയങ്ങനെ സ്വന്തം കൊക്കിലൊതുങ്ങുന്ന സാധങ്ങളുമെടുത്ത് അന്നന്നത്തെ ചിലവിനുള്ള വക തേടാനുള്ളത്ര ചില്ലറ മോഷണങ്ങള്‍ മാത്രമായി ഒതുങ്ങിക്കഴിഞ്ഞിരുന്ന സാധാരണ നാടന്‍ മോഷ്ടാവായിരുന്നു പത്രോസ്.

ഇതിന്റെ ഗുണമെന്തെന്നാല്‍ ആദ്യമൊക്കെ  ചില്ലറ മോഷണങ്ങളായതു കൊണ്ടോ വല്ല ചെമ്പോ ഉരുളിയോ കിണ്ടിയോ മോഷണം പോയെന്നു പറഞ്ഞ് പോലീസില്‍ പരാതിപ്പെടാനുള്ള നാട്ടുകാരുടെ മടി കൊണ്ടോ ഒക്കെ പത്രോസ് പലപ്പോഴും വലിയ പരിക്കുകള്‍ പറ്റാതെ രക്ഷപ്പെട്ടു പോന്നു. മോഷ്ടിയ്ക്കുന്ന സാധനങ്ങള്‍ പാത്രങ്ങളും മറ്റുമായതിനാല്‍ പത്രോസിന് അതെല്ലാം എളുപ്പത്തില്‍ വിറ്റു കാശാക്കാനും കഴിഞ്ഞു. മേലനങ്ങാതെ തിന്നാന്‍ മോഷണം ഒരു എളുപ്പവഴിയാണെന്നു കണ്ട പത്രോസാകട്ടെ തരം കിട്ടുമ്പോഴെല്ലാം ഈ പരിപാടി ആവര്‍ത്തിയ്ക്കാനും തുടങ്ങി. ചുരുക്കിപ്പറഞ്ഞാല്‍ നാട്ടുകാര്‍ക്ക് പാത്രങ്ങളും മറ്റും വിശ്വസിച്ച് വീടിനു പുറത്തു വച്ച് ഉറങ്ങാന്‍ പോകാനുള്ള ധൈര്യം നഷ്ടമായി. എന്നാലും പലയിടത്തു നിന്നായി തന്റെ ആവശ്യങ്ങള്‍ക്കുള്ളതെല്ലാം സംഘടിപ്പിയ്ക്കാന്‍ പത്രോസിന് കഴിഞ്ഞിരുന്നു.

'പലനാള്‍ കള്ളന്‍ ഒരുനാള്‍ പിടിയില്‍' എന്നാണല്ലോ. ഈ മോഷണങ്ങള്‍ ഒരു തുടര്‍ക്കഥയായപ്പോള്‍ പത്രോസിനും അക്കിടി പറ്റി. ഒരിയ്ക്കല്‍ നാട്ടുകാര്‍ ആശാനെ കയ്യോടെ പിടി കൂടി ചില 'കാര്യപരിപാടി'കള്‍ക്ക് ശേഷം പോലീസിലേല്‍പ്പിച്ചു. പോലീസുകാരുടെ കയ്യില്‍ നിന്ന് ആദ്യത്തെ ഇടി കിട്ടിയ ആ നിമിഷം തന്നെ നമ്മുടെ പത്രോസ് എല്ലാ കുറ്റവും ഏറ്റു പറഞ്ഞു. എന്നു മുതല്‍, എന്തൊക്കെ, എവിടെ നിന്നൊക്കെ മോഷ്ടിച്ചു എന്നതിന്റെ സ്ഥിതി വിവരക്കണക്കുകള്‍ അണുവിട തെറ്റാതെ പോലീസുകാരോട് പറഞ്ഞു കൊടുത്തു.

സ്റ്റേഷനില്‍ നിന്ന് ഇറങ്ങിയ ഉടനേ പത്രോസ് തീരുമാനിച്ചു. ഇനി ഈ പരിപാടിയ്ക്കില്ല. അടുത്ത ദിവസം പത്രോസ് പതിവു പോലെ പണിയ്ക്കു പോകുകയും ചെയ്തു. പക്ഷേ, അപ്പോഴേയ്ക്കും നാട്ടുകാര്‍ പത്രോസിന് 'കള്ളന്‍ പത്രോസ്' എന്ന വിളിപ്പേര് ചാര്‍ത്തിക്കൊടുത്തു കഴിഞ്ഞിരുന്നു. പണിയ്ക്കു പോകുമ്പൊഴും വരുമ്പോഴുമെല്ലാം ആളുകള്‍ ഒളിഞ്ഞും തെളിഞ്ഞും പത്രോസിനെ കള്ളന്‍ എന്ന് വിളിയ്ക്കാനും തുടങ്ങി. അങ്ങനെ കുറച്ചു നാള്‍ തുടര്‍ന്നപ്പോള്‍ പത്രോസിന് വീണ്ടും തോന്നി. എന്തായാലും കള്ളന്‍ എന്ന പേര് വീണു. മാത്രമല്ല, വീണ്ടും പണിയെടുക്കാന്‍ മടി തോന്നിത്തുടങ്ങി. മോഷ്ടിച്ച് ജീവിയ്ക്കുന്നതിന്റെ സുഖമാണെങ്കില്‍ ഒരിയ്ക്കല്‍ അനുഭവിച്ചതുമാണല്ലോ. പതിയെ പതിയെ
പത്രോസ്  മോഷണത്തിലേയ്ക്ക് തന്നെ മടങ്ങി.

ഇത്തവണ ആളുകള്‍ അറിയുമെന്നുള്ള ചമ്മലൊന്നും ആശാനെ അലട്ടിയില്ല. അതു കൊണ്ട് തരം കിട്ടുമ്പോഴൊക്കെ മോഷണം തുടര്‍ന്നു. ഇടയ്ക്കിടെ പിടിയ്ക്കപ്പെടും, നാട്ടുകാര്‍ പിടിച്ച് പോലീസിലേല്‍പ്പിയ്ക്കും. പതിവു പോലെ ആദ്യ ഇടിയ്ക്കു തന്നെ സത്യമെല്ലാം പറഞ്ഞ് തൊണ്ടി (വിറ്റു കാശാക്കിയിട്ടില്ലെങ്കില്‍) കയ്യോടെ പോലീസിനോ ഉടമസ്ഥനോ കൈമാറി തിരിച്ച് ഇറങ്ങും. വൈകാതെ വീണ്ടും ഇതേ പരിപാടികള്‍ ആവര്‍ത്തിയ്ക്കും.

അങ്ങനെയങ്ങനെ നാട്ടില്‍ ചില്ലറ മോഷണങ്ങള്‍ എന്തു നടന്നാലും നാട്ടുകാരും പോലീസും കള്ളന്‍ പത്രോസിനെ പിടി കൂടാന്‍ തുടങ്ങി. എവിടെ നിന്നെങ്കിലും പാത്രങ്ങളോ മറ്റോ കളവു പോയി എന്ന് ആരെങ്കിലും പോലീസില്‍ പരാതി പറഞ്ഞാല്‍ ഉടനേ ഒരു പോലീസ് ജീപ്പ് പത്രോസിന്റെ വീടിനു മുന്നിലെത്തും. ആശാനെയും പൊക്കിയെടുത്ത് തിരിച്ചു പോകും. പോലീസ് സ്റ്റേഷനിലെത്തി രണ്ട് ഇടി കൊണ്ടു കഴിഞ്ഞാല്‍ സാധനവും തിരിച്ചേല്‍പ്പിച്ച് പത്രോസ് തിരിച്ച് വീട്ടിലെത്തും. വീട്ടുകാര്‍ക്കും നാട്ടുകാര്‍ക്കും ഇതൊരു പതിവു കാഴ്ചയായിരുന്നു.

അങ്ങനെയിരിയ്ക്കെ വര്‍ഷങ്ങള്‍ക്ക് മുന്‍പുള്ള ഒരു മണ്ഡലമാസക്കാലം. നാടു മുഴുവനുമുള്ള വിശ്വാസികള്‍ മാലയിട്ട് നോമ്പെടുത്ത് ശബരിമലയ്ക്ക് പോകുന്ന സമയം. ആയിടെ ഒരു രാത്രി ആ നാട്ടിലെ ഒരു കല്യാണ വീട്ടില്‍ നിന്ന് രണ്ടു മൂന്ന് വലിയ ബിരിയാണി ചെമ്പുകള്‍ മോഷണം പോയി. കല്യാണ സദ്യയൊരുക്കാന്‍ കൊണ്ടു വന്ന ചെമ്പുകളാണ് നഷ്ടപ്പെട്ടത്. അതും നല്ല വില വരുന്ന വലിയ ചെമ്പു പാത്രങ്ങള്‍... പിറ്റേന്ന് നേരം വെളുത്തപ്പോള്‍ വീട്ടുകാര്‍ സംഭവമറിഞ്ഞു. സംഗതി നാട്ടുകാര്‍ അറിഞ്ഞപ്പോള്‍ ആളുകള്‍ എല്ലാവരും ഒരേയൊരു കാര്യം  തന്നെ പറഞ്ഞു ''മോഷണം പോയത് പാത്രങ്ങളാണെങ്കില്‍ അതിനു പിന്നില്‍ കള്ളന്‍ പത്രോസ് തന്നെ''!

വൈകാതെ പോലീസ് സ്റ്റേഷനിലേയ്ക്ക് പരാതിയുമായി ആളു പോയി. പതിവിന്‍ പടി പോലീസ് ജീപ്പ് നേരെ പത്രോസിന്റെ വീട്ടിലേയ്ക്ക് പറന്നു. അധികം വൈകാതെ നാട്ടുകാരെല്ലാവരും കണ്ടു, പത്രോസിനെയും പൊക്കിയെടുത്ത് ജീപ്പ് തിരിച്ചു പോകുന്നത്. പക്ഷേ, ഇത്തവണ സ്റ്റേഷനിലെത്തി എത്ര ഇടി കിട്ടിയിട്ടും പത്രോസ് കുറ്റം സമ്മതിച്ചില്ല. കാരണം ഇത്തവണത്തെ കളവില്‍ പത്രോസിന് യാതൊരു പങ്കും ഉണ്ടായിരുന്നില്ല എന്നതു തന്നെ. ഓരോ ഇടി കിട്ടുമ്പോഴും പത്രോസ് കരഞ്ഞു പറഞ്ഞു, അത്രയും വലിയ മോഷണങ്ങള്‍ താന്‍ ചെയ്യാറില്ല എന്ന്. പോലീസുകാര്‍ക്കും സംശയം തോന്നാതിരുന്നില്ല. ചെറിയ കളവുകളേ പത്രോസ് ചെയ്യാറുള്ളൂ എന്നത് മാത്രമല്ല, ആദ്യത്തെ ഇടിയ്ക്കു തന്നെ ആശാന്‍ സത്യം പറയാറുമുണ്ടല്ലോ. എന്തായാലും ഒരു തീരുമാനമാകാത്തതിനാല്‍ തല്‍ക്കാലം പോലീസുകാര്‍ പത്രോസിനെ ലോക്കപ്പില്‍ തന്നെ ഇടാന്‍ തീരുമാനിച്ചു.

ലോക്കപ്പില്‍ കിടക്കുമ്പോള്‍ പത്രോസ് ആലോചിച്ചു. പല തവണ മോഷണം നടത്തിയിട്ടുണ്ടെങ്കിലും ഈയൊരു അനുഭവം ഇതാദ്യമാണ്. ഇങ്ങനെ ലോക്കപ്പില്‍ കിടക്കേണ്ടി വന്നിട്ടുമില്ല, ഇത്രയധികം ഇടിയും കൊള്ളേണ്ടി വന്നിട്ടില്ല. അതും ചെയ്യാത്തെ കുറ്റത്തിന്. അങ്ങനെ ലോക്കപ്പില്‍ ഇടി കൊണ്ട വേദനയുമായി കിടക്കുമ്പോള്‍ പത്രോസ് മനം നൊന്ത് പ്രാര്‍ത്ഥിച്ചു....  ഈ ചെയ്യാത്ത കുറ്റത്തില്‍ നിന്ന് എന്നെ രക്ഷപ്പെടുത്തേണമേ എന്ന്. ഒപ്പം പത്രോസിന് മറ്റൊരു വഴി കൂടി തോന്നി. ഇത് ഇപ്പോള്‍ മണ്ഡലമാസമല്ലേ? ഇവിടെ കിടക്കുമ്പോള്‍ തന്നെ യഥാര്‍ത്ഥ മോഷ്ടാവിനെ അയ്യപ്പ സ്വാമിയുടെ കൃപ കൊണ്ട് പോലീസുകാര്‍ക്ക് കണ്ടെത്താനായാലോ? അങ്ങനെയാണെങ്കില്‍ ചെയ്യാത്തെ കുറ്റത്തിനു താന്‍ ലോക്കപ്പില്‍ കിടക്കേണ്ടല്ലോ. അങ്ങനെ ആ യഥാര്‍ത്ഥ മോഷ്ടാവിനെ ഒന്നു രണ്ടു ദിവസത്തിനുള്ളില്‍ ഇവര്‍ക്ക് കണ്ടു പിടിയ്ക്കാനായാല്‍ ഇത്തവണ തനിയ്ക്കും നോമ്പ് നോറ്റ് ശബരിമലയ്ക്ക് പോകണം.

യാദൃശ്ചികമോ ശരിയ്ക്കും സ്വാമി കടാക്ഷമോ എന്നറിയില്ല, എന്തായാലും തൊട്ടടുത്ത ദിവസം തന്നെ പോലീസിന് മറ്റൊരു കള്ളനെ കിട്ടി. ചോദ്യം ചെയ്യലിനിടയില്‍ ആ കല്യാണ വീട്ടിലെ ചെമ്പുകളും മറ്റും മോഷ്ടിച്ചത് അയാളാണെന്നും പാത്രങ്ങള്‍ എവിടെ, ആര്‍ക്ക് വിറ്റു കാശാക്കി എന്നുമെല്ലാം അയാള്‍ സമ്മതിച്ചു. അങ്ങനെ നമ്മുടെ പത്രോസിനെ പോലീസ് വിട്ടയയ്ക്കുകയും ചെയ്തു.

യാദൃശ്ചികമായാലും അല്ലെങ്കിലും ആ കള്ളനെ തൊട്ടടുത്ത ദിവസം തന്നെ പിടികൂടാനായത് അയ്യപ്പ സ്വാമിയുടെ കൃപ കൊണ്ടാണെന്ന് തന്നെ പത്രോസ് ഉറച്ചു വിശ്വസിച്ചു. അതു കൊണ്ടു തന്നെ വീട്ടിലെത്തിയ ഉടനെ പത്രോസ് അക്കാര്യം വീട്ടിലെ മറ്റംഗങ്ങളോടായി വെളിപ്പെടുത്തി."ഞാന്‍ ഇത്തവണ ശബരിമലയ്ക്ക് പോകുന്നു. ഇന്നു തന്നെ വ്രതം തുടങ്ങുകയാണ്". ഇതു കേട്ട് പത്രോസിന്റെ അപ്പനുമമ്മയും സഹോദരങ്ങളും എന്നു വേണ്ട ഭാര്യ പോലും പുച്ഛിച്ചു ചിരിച്ചു. പോലീസിന്റെ ഇടി കൊണ്ടതിന്റെ ആ ഒരു ഹാങ്ങ് ഓവര്‍ ആയിരിയ്ക്കും എന്നേ അവര്‍ കരുതിയുള്ളൂ. പക്ഷേ, പത്രോസ് അപ്പോള്‍ തന്നെ കുളിച്ചു വന്ന് വീടും പരിസരവും സ്വന്തം മുറിയുമെല്ലാം വൃത്തിയാക്കുന്നതു കണ്ടപ്പോള്‍ വീട്ടുകാരുടെ ചിരി മാഞ്ഞു, അമ്പരപ്പായി. അടുത്തതായി ടൌണില്‍ പോയി അയ്യപ്പ സ്വാമിയുടെ ചില്ലിട്ട വലിയ ഒരു ചിത്രവും അതിനു മുന്നില്‍ തിരിയിട്ടു കത്തിയ്ക്കാന്‍ ഒരു കൊച്ചു നിലവിളക്കും ചന്ദനത്തിരിയുമെല്ലാമായി അയാള്‍ വീണ്ടുമെത്തിയപ്പോള്‍ എല്ലാവര്‍ക്കും അമ്പരപ്പായി. അന്നുച്ചയ്ക്ക് ചോറിനു കറിയായി വീട്ടില്‍ നിന്നും കൊടുത്ത മീന്‍കറി പത്രോസ് തൊട്ടില്ല. മാത്രമല്ല, ഇനി ഒരു പത്തു നാല്പതു ദിവസത്തേയ്ക്ക് വീട്ടിലെല്ലാവരും നോണ്‍ വെജിറ്റേറിയന്‍ ഉപേക്ഷിയ്ക്കണമെന്നും ശുദ്ധിയോടെ വീടും പരിസരവും നോക്കണമെന്നും കൂടി പറഞ്ഞപ്പോള്‍ എല്ലാവരുടെയും മുഖം ചുളിഞ്ഞു.

തൊട്ടടുത്ത ദിവസം രാവിലെ തന്നെ പത്രോസ് പുഴയില്‍ പോയി കുളിച്ച് ശുദ്ധിയായി തിരിച്ചു വീട്ടിലെത്തി തന്റെ മുറിയില്‍ ആണിയടിച്ച് തൂക്കിയ അയ്യപ്പ സ്വാമിയുടെ ചിത്രത്തിനു മുന്നില്‍ തിരി തെളിച്ച് തനിയ്ക്കറിയാവുന്ന രീതിയിലെല്ലാം ശരണം വിളിച്ച് തന്റെ വ്രതം തുടങ്ങി. എന്നിട്ട് രാവിലെ തന്നെ മടിയെല്ലാം മാറ്റി പഴയതു പോലെ കൂലിപ്പണിയ്ക്ക് പോയി. പക്ഷേ, വീട്ടിലാര്‍ക്കും പത്രോസിന്റെ ഈ മാറ്റം ദഹിച്ചില്ല. അവരാരും തന്നെ അയാള്‍ പറഞ്ഞതൊന്നും മുഖവിലയ്ക്കെടുത്തില്ല. അവര്‍ പതിവു പോലെ മീനും ഇറച്ചിയുമെല്ലാം വാങ്ങി പാകം ചെയ്ത് കഴിച്ചു, വൈകുന്നേരം പത്രോസിന് ചോറിനൊപ്പം അതൊക്കെ വിളമ്പുകയും ചെയ്തു. ഇതു കണ്ട്  വിഷമത്തിലായ അയാള്‍ വീണ്ടും ഭാര്യയോടും അമ്മയോടുമെല്ലാം തല്കാലത്തേയ്ക്ക് മത്സ്യമാംസങ്ങള്‍ ഉപേക്ഷിയ്ക്കാന്‍ അഭ്യര്‍ത്ഥിച്ചു എങ്കിലും അവരത് കേട്ടതായി പോലും നടിച്ചില്ല.

നിവൃത്തിയില്ലാതായപ്പോള്‍ പിറ്റേന്ന് മുതല്‍ പത്രോസ് വീട്ടില്‍ നിന്നും ഭക്ഷണം കഴിയ്ക്കാതായി. രാവിലെയും ഉച്ചയ്ക്കും വൈകീട്ടുമെല്ലാം പണിയ്ക്കു പോകുന്ന സുഹൃത്തുക്കള്‍ക്കൊപ്പമായി ഭക്ഷണം. അവരില്‍ തന്നെ മലയ്ക്കു പോകാന്‍ മാലയിട്ട ചില സ്വാമിമാരുമുണ്ടായിരുന്നു. അവരോട് ചോദിച്ച് വ്രതാനുഷ്ഠാനത്തിന്റെ രീതികളെല്ലാം മനസ്സിലാക്കി, കൂടുതല്‍ ശരണമന്ത്രങ്ങള്‍ പഠിച്ചു.
അവരുടെ സഹായത്തോടെ ഒരു രുദ്രാക്ഷമാല വാങ്ങി പൂജിച്ച് മാലയിട്ടു. പതിവില്ലാതെ ജീവിതത്തില്‍ ഒരു അടുക്കും ചിട്ടയുമെല്ലാം പത്രോസിന് അനുഭവപ്പെട്ടു. മോഷണ ചിന്തകള്‍ മുഴുവനായും മാറി നിന്നു.

പക്ഷേ, വീട്ടില്‍ പത്രോസിന് പരീക്ഷണ കാലമായിരുന്നു. ഒരു ദിവസം പത്രോസ് പണി കഴിഞ്ഞ് സന്ധ്യയ്ക്ക് വീട്ടിലെത്തിയ ശേഷം കുളിച്ച് ശരണം ജപിയ്ക്കാന്‍ മുറിയിലെത്തിയപ്പോള്‍ അയ്യപ്പ സ്വാമിയുടെ ഫോട്ടോ അപ്രത്യക്ഷമായിരിയ്ക്കുന്നു. അന്വേഷിച്ചിട്ടും വീട്ടില്‍ ആരും മറുപടി പറഞ്ഞില്ല. കുറേ നേരത്തെ അന്വേഷണത്തിനൊടുവില്‍ അയാള്‍ക്ക് ആ ഫോട്ടോ അടുക്കളയിലെ സ്റ്റോര്‍ റൂമില്‍ മീന്‍കറി പാത്രത്തിനടിയില്‍ നിന്ന് കിട്ടി. മീന്‍ ചട്ടി വച്ചിരുന്നത് ഈ ചിത്രത്തിനു മുകളിലായിരുന്നു. പിന്നീടൊരിയ്ക്കല്‍ വ്രതത്തിന് ഒരു ബലം കൂട്ടാനോ എന്തോ ഒരു തുളസീ മാല കൂടി വാങ്ങി വച്ചിരുന്നു. അത് ഇടാന്‍ തീരുമാനിച്ചതിന്റെ തലേന്ന് വീണ്ടും ആ ചിത്രവും ആ മാലയും മുറിയില്‍ നിന്ന് കാണാതായി. പഴയതു പോലെ തന്നെ സ്റ്റോര്‍ റൂമില്‍ പരതിയെങ്കിലും പരാജയപ്പെട്ട് അടുക്കളയിലെത്തിയ പത്രോസ്
അടുക്കളയിലേയ്ക്ക് അന്വേഷിച്ചു ചെന്നപ്പോള്‍ അടുക്കളയില്‍ കോഴിക്കറി പാചകം ചെയ്തു കൊണ്ടിരിയ്ക്കുന്ന പെങ്ങളെ  കണ്ടു. പെങ്ങളോട്  അതെപ്പറ്റി ചോദിച്ചെങ്കിലും അറിയില്ല എന്ന മറുപടി ആണ് കിട്ടിയത്. എന്നാല്‍ ആ മറുപടിയില്‍ വിശ്വാസം വരാതെ അവിടെ എല്ലയിടത്തും ഒന്നു കൂടി നടന്നു നോക്കിയ അയാള്‍ കാണുന്നത് തിളയ്ക്കുന്ന കോഴിക്കറി പാത്രത്തിനരികിലുള്ള ആണിയില്‍ പുകയും കരിയും  ചൂടുമേറ്റ് കിടക്കുന്ന തന്റെ അയ്യപ്പ സ്വാമിയെയാണ്. ഒപ്പം, ഇടാനായി മാറ്റി വച്ച ആ തുളസീമാലയും. ആ കാഴ്ച കണ്ട് പത്രോസിന്റെ കണ്ണു നിറഞ്ഞു. കറി പാകം ചെയ്തു കൊണ്ടിരുന്ന പെങ്ങളോട് അങ്ങനെ ചെയ്യരുത്, പാപമാണ്, ഈശ്വരന്‍ ഏതായാലും അവരെ പരീക്ഷിയ്ക്കരുത് എന്നൊക്കെ പറഞ്ഞേങ്കിലും അവിടെയും പുച്ഛത്തോടെയുള്ള ഒരു ചിരിയായിരുന്നു പത്രോസിനുള്ള മറുപടി. പത്രോസ് ആ ചിത്രവും മാലയും തിരിച്ചെടുത്ത് കഴുകി വൃത്തിയാക്കി. ചിത്രം വീണ്ടും മുറിയില്‍ വച്ച്  മാല കഴുത്തിലിട്ടു വീണ്ടും പണിയ്ക്കു പോയി.

അന്ന് വൈകുന്നേരം പണി കഴിഞ്ഞ് തിരിച്ചെത്തിയ പത്രോസിനെ ഒരു വാര്‍ത്ത കാത്തിരിപ്പുണ്ടായിരുന്നു. അന്നുച്ചയ്ക്ക് ഭക്ഷണം കഴിയ്ക്കുന്നതിനിടെ ഇറച്ചിയുടെ എല്ല് തൊണ്ടയില്‍ കുടുങ്ങി പെങ്ങളെ ആശുപത്രിയില്‍ അഡ്മിറ്റ് ആക്കിയിരിയ്ക്കുകയാണ് എന്ന്. സംഗതി സീരിയസ് അല്ലെങ്കിലും ഒരു മൈനര്‍ ഓപ്പറേഷന്‍ വേണ്ടി വന്നത്രെ. കാര്യം അതത്ര നല്ല വാര്‍ത്ത അല്ലെങ്കിലും ഈ സംഭവം പത്രോസിന്റെ ഭക്തി വര്‍ദ്ധിപ്പിച്ചു. അയാള്‍ അത് ഒരു മുന്നറിയിപ്പ് എന്ന പോലെ വീട്ടുകാരെ ബോദ്ധ്യപ്പെടുത്തുകയും ചെയ്തു.

അയാള്‍ പറഞ്ഞതു പോലെ ഇനിയൊരു പരീക്ഷണം വേണ്ട എന്നു കരുതിയിട്ടോ കുറച്ചൊക്കെ വിശ്വാസം വന്നിട്ടോ എന്തോ പിന്നീട് ആരും പത്രോസിനെ ശല്യം ചെയ്യാന്‍ മുതിര്‍ന്നില്ല. രണ്ടു മൂന്നു ദിവസത്തിനു ശേഷം കെട്ടു നിറച്ച് ഇരുമുടിക്കെട്ടുമേന്തി, കന്നി അയ്യപ്പനായി പത്രോസ് തന്റെ സ്വാമിമാരായ സുഹൃത്തുക്കള്‍ക്കൊപ്പം ശബരിമലയിലേയ്ക്ക് തിരിച്ചു. അങ്ങനെ പമ്പയിലെത്തിയ പത്രോസ് എല്ലാവരെയും പോലെ പമ്പയാറില്‍ മുങ്ങിക്കുളിയ്ക്കാനിറങ്ങി. മൂന്നു തവണ മുങ്ങി പൊങ്ങിക്കഴിഞ്ഞ  ശേഷമാണ് പത്രോസ് അക്കാര്യം ശ്രദ്ധിച്ചത്. കഴുത്തില്‍ ഒരൊറ്റ മാലയില്ല! അത് മുങ്ങലിനിടയിലെങ്ങനെയോ അവ നഷ്ടപ്പെട്ടിരിയ്ക്കുന്നു.

മാല നഷ്ടപ്പെട്ടതറിഞ്ഞ പത്രോസിന് പരിഭ്രാന്തിയായി. തന്റെ വ്രതമെടുക്കലില്‍ പറ്റിയ വീഴ്ച കൊണ്ടാകുമോ അവ നഷ്ടപ്പെട്ടത്. എന്തു ചെയ്യും എന്നറിയാതെ പകച്ചു നില്‍ക്കുമ്പോള്‍ പെട്ടെന്ന് പമ്പയാറിന്റെ കരയില്‍ നില്‍ക്കുന്ന ഒരു വൃദ്ധ സ്വാമി തന്റെ നേരെ നോക്കുന്നത് പത്രോസിന്റെ ശ്രദ്ധയില്‍ പെട്ടു. അങ്ങോട്ടൊന്നും ചോദിയ്ക്കാതെ തന്നെ അയാള്‍ പത്രോസിനോട് പറഞ്ഞു. "പേടിയ്ക്കണ്ട, നഷ്ടപ്പെട്ട ആ  മാലകള്‍ക്ക് ശുദ്ധിയില്ല, അതാണ് അത് നഷ്ടപ്പെട്ടത്. അതു സാരമാക്കണ്ട, ഇതാ ഈ മാലയിട്ട് മുങ്ങിക്കുളിച്ച് മല കയറിക്കോളൂ" ഇതും പറഞ്ഞ് അയാള്‍ മറ്റൊരു മാല പത്രോസിനു നേരെ നീട്ടി. ആശ്വാസത്തോടെ പത്രോസ് ആ മാല വാങ്ങി പ്രാര്‍ത്ഥനയോടെ കഴുത്തിലണിഞ്ഞ് വീണ്ടും മുങ്ങി നിവര്‍ന്ന് കരയ്ക്കു കയറി. നന്ദി പറയാനായി ആ വൃദ്ധ സ്വാമിയെ തിരഞ്ഞെങ്കിലും അയാള്‍ ആള്‍ക്കൂട്ടത്തിലെങ്ങോ അപ്രത്യക്ഷനായിരുന്നു.

തുടര്‍ന്ന് ശരണം വിളികളോടെ മറ്റു സ്വാമിമാര്‍ക്കൊപ്പം പത്രോസ് സ്വാമിയും മല കയറി. പതിനെട്ടാം പടിയും കടന്ന് അയ്യപ്പ സ്വാമിയെ ആദ്യമായി ദര്‍ശിച്ച് അഭിഷേകങ്ങളെല്ലാം കഴിഞ്ഞ് സാവധാനം മലയിറങ്ങി. തിരിച്ച് വീട്ടിലെത്തുമ്പോഴേയ്ക്കും മനസ്സു കൊണ്ട് പത്രോസ് ഒരു പ്രതിജ്ഞ എടുത്തിരുന്നു. ഇനിയൊരിയ്ക്കലും താന്‍ മോഷ്ടിയ്ക്കില്ല. അറിയാവുന്ന പോലെ മാന്യമായ് തൊഴിലെടുത്ത് ഇനിയുള്ള കാലം ജീവിയ്ക്കും. മാത്രമല്ല, പറ്റുമ്പോഴെല്ലാം ശബരിമലയ്ക്ക് പോകുകയും ചെയ്യും.

ആ സംഭവത്തിനു ശേഷം ഇപ്പോള്‍ വര്‍ഷങ്ങള്‍ കഴിഞ്ഞു. പത്രോസ് കൂലിപ്പണിയെടുത്താണെങ്കിലും ഇന്ന് സംതൃപ്തനായി, സുഖമായി ജിവിയ്ക്കുന്നു. പത്രോസിന് ഇന്ന് ആ നാട്ടില്‍ മാന്യമായ് ഒരു സ്ഥാനമുണ്ട്. കള്ളന്‍ പത്രോസ് എന്ന പേര് ഇന്ന് നാട്ടുകാര്‍ മറന്നു കഴിഞ്ഞ മട്ടാണ്. പകരം പലര്‍ക്കും അയാള്‍ ഇന്ന് പത്രോസ് സ്വാമിയാണ്. പല തവണ മലയ്ക്കു പോയതിനാല്‍ എങ്ങനെയോ വന്നു പോയ പേര്. അന്നത്തെ സംഭവങ്ങളെ കുറിച്ച് ചോദിയ്ക്കുന്നവരോട് പത്രോസ് ഇന്നും ഉറപ്പിച്ചു പറയുന്നു... അന്ന് പമ്പയില്‍ വച്ച് തനിയ്ക്കു മാല തന്ന് സമാധാനിപ്പിച്ച് അപ്രത്യക്ഷനായത് മറ്റാരുമല്ല, അയ്യപ്പ സ്വാമി തന്നെ ആണെന്ന്.

പത്രോസിന്റെ ധാരണ സത്യം തന്നെ ആയാലും അല്ലെങ്കിലും ഇന്ന് പത്രോസ് സന്തോഷവാനാണ്. അതു പോലെ അയാളുടെ കുടുംബവും സുഹൃത്തുക്കളും നാട്ടുകാരും.

54 comments:

  1. ശ്രീ said...

    ഇത് നീര്‍മിഴിപ്പൂക്കളില്‍ 2013 ലെ ആദ്യ പോസ്റ്റ് ആണ്.

    ഒരു സംഭവ കഥയാണ് ഇത്തവണ. വര്‍ഷങ്ങള്‍ക്ക് മുന്‍പ് ഇതു പോലൊരു മണ്ഡല മാസത്തില്‍ ഞങ്ങളുടെ അടുത്ത നാട്ടില്‍ നടന്ന ഒരു യഥാര്‍ത്ഥ കഥ.

    എഴുതി വന്നപ്പോള്‍ സ്വല്‍പം നീളം കൂടിപ്പോയോ എന്ന് സംശയം ഇല്ലാതില്ല.

  2. അമൃതംഗമയ said...

    സ്വാമിയേ ശരണമയ്യപ്പാ
    ഹി ഹി .... ചിന്താവിഷ്ടയായ ശ്രീനിവാസന്‍റെ അനിയന്‍ പത്രോസ് സ്വാമി .... സംഗതി കലക്കി
    ദൈവം ഏതായാലും വിശ്വാസം അതല്ലേ എല്ലാം

  3. ഫിയൊനിക്സ് said...

    Like alwyas you rock Sree...Wish u a Happy New Year 2013.

  4. keraladasanunni said...

    പത്രോസിന്ന് മാനസാന്തരം വന്നത് സ്വാഭാവികം. ചെയ്യാത്ത കുറ്റത്തിന്ന് ലോക്കപ്പില്‍ കിടക്കേണ്ടി വന്നപ്പോള്‍ മനം
    നൊന്തു പ്രാര്‍ത്ഥിച്ചതും യഥാര്‍ത്ഥ കുറ്റവാളി പിടിക്കപ്പെട്ടതും അയാളെ അയ്യപ്പ ഭക്തനാക്കി. പെങ്ങള്‍ക്ക് ശിക്ഷയെന്നോണം ആസ്പത്രിയില്‍
    ചെല്ലേണ്ടി വന്നത് അതിനെ വര്‍ദ്ധിപ്പിച്ചു. ഒടുക്കം മാല നല്‍കി അപ്രത്യക്ഷനായ വൃദ്ധസ്വാമി ദൈവം പ്രത്യക്ഷപ്പെട്ടതാണെന്ന് അയാള്‍ വിശ്വസിച്ചു.
    ഏതായാലും അയാള്‍ തെറ്റിന്‍റെ വഴി ഉപേക്ഷിച്ചല്ലോ. അത് നന്നായി.

  5. kARNOr(കാര്‍ന്നോര്) said...

    ഏതായാലും അയാള്‍ തെറ്റിന്‍റെ വഴി ഉപേക്ഷിച്ചല്ലോ. അത് നന്നായി.

  6. മൈലാഞ്ചി said...

    നന്നായി ശ്രീ.. നല്ലവരാകണമെന്ന് ആഗ്രഹമുള്ളവര്‍ക്ക് ഒരു കാരണം കിട്ടിയാല്‍ അവര്‍ നന്നായിക്കോളും അല്ലേ?

  7. മൈലാഞ്ചി said...

    പുതുവത്സരാശംസകള്‍ ട്ടോ

  8. ചിതല്‍/chithal said...

    ശ്രീ, നീളം ഒരു പ്രശ്നമേയല്ല, നല്ല പോസ്റ്റാണെങ്കിൽ. ഇതൊരു കലകലക്കൻ പോസ്റ്റല്ലേ!

  9. കുന്നെക്കാടന്‍ said...

    ഉഷാര്‍ ആയിട്ടുണ്ട്.

  10. ajith said...

    പത്രോസ് സ്വാമി മാനസാന്തരപ്പെട്ടല്ലോ
    അത് നന്നായി

  11. ശ്രീ said...

    അമൃതംഗമയ...
    അതെയതെ. വിശ്വാസം തന്നെ എല്ലാം.
    2013 ലെ ആദ്യ കമന്റിനു നന്ദി :)

    ഫിയൊനിക്സ് ...
    വളരെ നന്ദി മാഷേ.
    keraladasanunni ...
    സ്വാഗതം മാഷേ. ശരിയാണ്. ഓരോ സംഭവങ്ങളും അയാളുടെ വിശ്വാസം ബലപ്പെടുത്തി എന്നേ ഉള്ളൂ.

    kARNOr(കാര്‍ന്നോര്)...
    അതെയതെ.

    മൈലാഞ്ചി ചേച്ചീ...
    ശരിയാണ്, നന്നാകണം എന്ന് പത്രോസിന്റെ ഉള്ളിന്റെയുള്ലിലും ഒരാഗ്രഹം ഉണ്ടായിരുന്നിരിയ്ക്കണം.
    ആശംസകള്‍ക്ക് നന്ദി.

    ചിതല്‍/chithal ...
    വളരെ നന്ദി, മാഷേ... സുഖമല്ലേ? :)

    കുന്നെക്കാടന്‍ ...
    വായനയ്ക്കും കമന്റിനും നന്ദി.

    ajith മാഷേ...
    അതെ. ആ സംഭവം അതിന് ഒരു കാരണമായി.

  12. പിള്ളേച്ചന്‍‌ said...

    ''മോഷണം പോയത് പാത്രങ്ങളാണെങ്കില്‍ അതിനു പിന്നില്‍ കള്ളന്‍ പത്രോസ് തന്നെ''!

    chathathu kamsanenkil konnathu keechakan thanne !!!.
    kollam. Nalla post. ethu pole mattu kallanmar mariyirunenkil ?

  13. ഡോ. പി. മാലങ്കോട് said...

    പശ്ചാത്താപം പ്രായശ്ചിത്തം. അതുപോലെ, മാനസാന്തരം.... മനസ്സമാധാനം തന്നെ. നല്ല കാര്യം. നന്നായി എഴുതി. അല്‍പ്പം നീളം കുറക്കുന്നത് തന്നെയാണ് നല്ലത് എന്ന് തോന്നുന്നു. ഭാവുകങ്ങള്‍.

  14. MyDreams said...

    ശ്രീയുടെ മുന്‍പത്തെ പോസ്റ്റിന്റെ അത്ര നന്നായില്ല എന്ന് നിരാശയെകാള്‍ സങ്കടത്തോടെ പറയേണ്ടി വരുന്നു

  15. ജീവി കരിവെള്ളൂർ said...

    തലക്കെട്ടിൽ ഒരു ആൾദൈവത്തിലേക്കുള്ള പരിണാമം സംശയിച്ചിരുന്നു. ഭാഗ്യം! അതുണ്ടായില്ലല്ലോ...

  16. രഘുനാഥന്‍ said...

    ഏതായാലും പത്രോസ് സ്വാമി നല്ലവനായല്ലോ....സ്വാമി ശരണം.

  17. Villagemaan/വില്ലേജ്മാന്‍ said...

    പോസ്റ്റ്‌ അല്‍പ്പം നീണ്ടു പോയാലെന്താ..വായിക്കാന്‍ നല്ല രസമുണ്ടായിരുന്നു എല്ലാ നാട്ടിലും ഉണ്ടാവും ഇങ്ങനെ ചില മീശ മാധവന്മാര്‍ ! ഞങ്ങളുടെ സ്ഥലത്തും ഉണ്ടായിരുന്നു ഇങ്ങനെ ഒരാള്‍.. കേള്‍ക്കാതെ കള്ളന്‍ എന്നും , കേള്‍ക്കെ അയാളെ ചേട്ടാ എന്നും ആളുകള്‍ വിളിച്ചു !

    പുതുവത്സരാശംസകളോടെ

    വില്ലേജ് മാന്‍ !

  18. Anoop Technologist (അനൂപ് തിരുവല്ല) said...

    പത്രോസ് സ്വാമിയായ കഥ തകർപ്പനായി !

  19. ശ്രീ said...

    പിള്ളേച്ചാ...
    'ചത്തത് കീചകനെങ്കില്‍ കൊന്നത് ഭീമന്‍ തന്നെ' എന്നല്ലേ?

    അതെ, എല്ലാ കള്ളന്മാരും ഇങ്ങനെ നല്ലവരായാല്‍ എന്തു നന്നായിരുന്നു...

    ഡോ. പി. മാലങ്കോട് ...
    സ്വാഗതം മാഷേ.
    ഈ പോസ്റ്റ് എഴുതി വന്നപ്പോള്‍ ഇത്രയും വലുതായിപ്പോയി. വെട്ടിച്ചുരുക്കാന്‍ തോന്നിയില്ല.
    കമന്റിനു നന്ദി.

    MyDreams ...
    നിരാശപ്പെടുത്തിയെങ്കില്‍ ക്ഷമിയ്ക്കുമല്ലോ :)
    തുറന്നെഴുതിയതില്‍ സന്തോഷം

    ജീവി കരിവെള്ളൂർ ...
    അങ്ങനെ വായനക്കാര്‍ സംശയിച്ചേക്കുമോ എന്ന് എനിയ്ക്കും ആശങ്ക ഇല്ലാതിരുന്നില്ല.

    വായനയ്ക്കും കമന്റിനും നന്ദി മാഷേ.

    രഘുനാഥന്‍ മാഷേ...
    വീണ്ടും ഇവിടെ വന്നെത്തിയതില്‍ സന്തോഷം :)

    Villagemaan/വില്ലേജ്മാന്‍ ...
    ശരിയാണ് മാഷേ. എല്ലാ നാട്ടിലുമുണ്ടാകും അതേ പോലെ ഒരാളെങ്കിലും :)

    അനൂപേട്ടാ...
    കുറേ നാളിനു ശേഷമുള്ള വരവില്‍ സന്തോഷം.

  20. ramanika said...

    സമാനമായ പല അനുഭവങ്ങളും കേട്ടിട്ടുണ്ട്
    നന്നായി പറഞ്ഞു
    ഹാപ്പി 2013

  21. A.R said...

    ശ്രീ നല്ല രസമുണ്ട് വായിക്കാന്‍

  22. അമ്മാച്ചു said...

    ഞാന്‍ ഇവിടെ ആദ്യമായാണ്‌ .
    പത്രോസ് സ്വാമി കൊള്ളാം .
    കഥയുടെ നീളം ഒരു പ്രശ്നമായി തോന്നിയില്ല .
    പുതുവത്സരാശംസകള്‍. :-)

  23. അമ്പിളി. said...

    നല്ല നാടന്‍ കഥ ..... നല്ല ഭംഗിയില്‍ പറഞ്ഞു തന്നു ശ്രീ....

    കള്ളന്മാരിലാത്ത നാടുണ്ടാവില്ല.... പക്ഷെ ചത്തത് കീചകനെങ്കില്‍ കൊന്നത് ഭീമന്‍ തന്നെ എന്ന് കണ്ണടച്ച് പറയും പോലെ ചില കളവു നടന്ന സ്ഥലവും സംഭവും വച്ച് അച്ചട്ടായി നമ്മുക്ക് പറയാന്‍ പറ്റും ആരാ അതെടുത്തതെന്നു അല്ലെ ശ്രീ? കൊള്ളാം കേട്ടോ... നന്നായി ആസ്വദിച്ചു ഞാന്‍. ആശംസകള്‍.

  24. ആറങ്ങോട്ടുകര മുഹമ്മദ്‌ said...

    സാധാരണക്കാരനായ ഒരു മനുഷ്യന്റെ കഥയായത് കൊണ്ടുതന്നെ ലളിതമായ അവതരണം ഉചിതമായി.വായിച്ചവസാനിച്ചത് അറിഞ്ഞില്ല.ഹൃദ്യം.ആശംസകള്‍

  25. shajkumar said...

    നന്ദി ശ്രീ . ശ്രീയെ കമന്റില്‍ കണ്ടിട്ട് വര്‍ഷങ്ങളാകുന്നു.

  26. ഇന്‍ഡ്യാഹെറിറ്റേജ്‌:Indiaheritage said...

    അയ്യപ്പസ്വാമിയെ കുറിച്ചാകുമ്പോൾ എനിക്കും ഇതിൽ ഒരഭിപ്രായം പറയാമല്ലൊ അല്ലെ?

    ഞാൻ പണ്ട് കർണ്ണാടകയിൽ ജോലി ചെയ്തിരുന്ന കാലം

    എവിടെ ആയാലും ഭജനയിൽ പങ്കെടൂക്കുന്ന സ്വഭാവ്മ് ചെറുപ്പത്തിലെ ഉണ്ട്.

    മണ്ഡലകാലം തുടങ്ങിയതു മുതൽ ഓരോ വീടുകളിലായി പൂജ വച്ചു തുടങ്ങി. എല്ലായിടത്തും ഞങ്ങൾ ഒന്നിക്കും ഭജന നടത്തും അവസാനം പ്രസാദവും കഴിച്ച് മടങ്ങും

    എനിക്കാണെങ്കിൽ മധുരം വളരെ ഇഷ്ടം അതുകൊണ്ട് പായസം ത്രിമധുരം പാനകം ഇവ ആവുന്നത്ര അടീച്ചു കയറ്റും

    ഒരു ദിവസം വീട്ടിൽ എത്തി കിടന്നുറങ്ങി രാത്രി ഒരു രണ്ടു മണി ആയിക്കാണും വയറു വേദനിച്ചിട്ട് ഒരു നിവൃത്തിയും ഇല്ല. ഞാൻ അന്ന് ആയുർവേദ വൈദ്യൻ ആയിരുന്നു. പെട്ടെന്നു വയറുവേദന കുറയാനുള്ള സാദഹ്നം ഒന്നും കയ്യിലില്ല താനും

    അവസാനം ഞാൻ ഒരു പരിപാടി അങ്ങു ചെയ്തു

    അയ്യപ്പനെ വിളിച്ച് ഒരു ഭീഷണി അങ്ങു പ്രയോഗിച്ചു ഒന്നു വെരുട്ടി. ഞാൻ പറഞ്ഞു "നിന്റെ ഭജനയ്ക്കു പാടിയിട്ട് നിന്റെ പ്രസാദം കഴിച്ചു കിടന്ന് എനിക്ക് ഇതാൺ ഫലം എങ്കിൽ ഇനി നോക്കിക്കൊ ഭജന ആരു പാടും എന്നു കാണാം അടൂത്ത തവണ"

    പക്ഷെ അതു കഴിഞ്ഞ് ഞാൻ എങ്ങനെ ആണുറങ്ങിപ്പോയത് എന്നറിയില്ല പിന്നീട് ഏഴു മണിയ്ക്കാൺ ഉണരുന്നത് അന്നേരം വേദനയുമില്ല ഒന്നും ഇല്ല

  27. ശ്രീ said...

    ramanika ...
    വളരെ നന്ദി മാഷേ.

    A.R...
    സ്വാഗതം മാഷേ. വായനയ്ക്കും കമന്റിനും നന്ദി.

    അമ്മാച്ചു ...
    സ്വാഗതം. ആദ്യമായുള്ള വരവിനും വായനയ്ക്കും ആശംസകള്‍ക്കും നന്ദി.

    അമ്പിളി...
    ശരിയാണ്, ചില കള്ളന്മാര്‍ക്ക് അവരുടേതായ ശൈലിയുണ്ടാകുമെന്ന് പറയുന്നത് ശരിയാണ്.
    നന്ദി. :)

    ആറങ്ങോട്ടുകര മുഹമ്മദ്‌ ...
    സ്വാഗതം മാഷേ. നല്ല വാക്കുകള്‍ക്ക് നന്ദി.

    shajkumar...
    ശരിയാണ് മാഷേ, കുറേക്കാലമായി അങ്ങോട്ടൊക്കെ വന്നിട്ട്. ആ പോസ്റ്റ് വായിച്ചപ്പോള്‍ ഇതു തന്നെ ഞാനുമോര്‍ത്തു :)

    സന്ദര്‍ശനത്തിനു നന്ദി.

    ഇന്‍ഡ്യാഹെറിറ്റേജ്‌ ...
    വളരെ നന്ദി മാഷേ, വരവിനും ആ അനുഭവം പങ്കു വച്ചതിനും :)

    ചിലരെങ്കിലും സമാനമായ അനുഭവങ്ങള്‍ പറഞ്ഞു കേട്ടിട്ടുണ്ട്.

  28. വിനുവേട്ടന്‍ said...

    സ്വാമിയായാലും പാതിരിയായാലും പത്രോസ് നന്നായല്ലോ... അതുമതി... അനുഭവം രസകരമായി അവതരിപ്പിച്ചു കേട്ടോ ശ്രീ...

  29. kochumol(കുങ്കുമം) said...

    പത്രോസ് സ്വാമിയായാലെന്താ കള്ളന്‍ എന്ന പേര് മാറിയില്ലേ ..
    വായിച്ചു വന്നപ്പോള്‍ നീളകൂടുതല്‍ അറിഞ്ഞില്ല ശ്രീ..
    പുതുവത്സരാശംസകള്‍

  30. Echmukutty said...

    രസിച്ചു വായിച്ചു കേട്ടോ, ശ്രീ....അഭിനന്ദനങ്ങള്‍.

  31. ബിലാത്തിപട്ടണം Muralee Mukundan said...

    അയൽനാട്ടിലെ പണ്ടത്തെ
    പാത്ര കള്ളൻ പത്രോസ് കൂട്
    വിട്ട് കൂറുമാറി ഒരു സന്തുഷ്ട്ടനായ
    ഇന്നത്തെ പത്രോസ് സ്വാമിയായതിന്റെ പത്രോസനുഭവങ്ങൾ ശ്രീ ഇവിടെ ലളിത സുന്ദരമായി വളരെ മനോഹരമായി ആവിഷ്കരിച്ചിരിക്കുകയാണല്ലോ...

    അഭിനന്ദനങ്ങൾ...!!

  32. ഹരിശ്രീ said...

    :)

  33. mayflowers said...

    പത്രോസ് എന്ന വിശ്വാസി..
    നല്ല വിവരണം.

  34. വീ കെ said...

    വിശ്വാസം ഏതായാലും മനുഷ്യൻ നന്നായാൽ മതി..!!
    ആശംസകൾ.........

  35. ചന്ദ്രകാന്തം said...

    ..... കുറെ കാലത്തിന്‌ ശേഷമാണ്‌ ശ്രീയുടെ ബ്ലോഗില്‍ വരുന്നത്‌. പത്രോസ്‌ സ്വാമിയെ വായിച്ചു; എല്ലാ നാട്ടിന്‍പുറങ്ങള്‍ക്കും ചിരപരിചിതനായ ഒരു കഥാപാത്രത്തെ കണ്ടതില്‍ സന്തോഷം.

  36. ശ്രീ said...

    വിനുവേട്ടാ...
    വളരെ സന്തോഷം, നന്ദി

    kochumol(കുങ്കുമം)...
    വായനയ്ക്കും കമന്റിനും നന്ദി. നീളക്കൂടുതല്‍ ബോറടിപ്പിച്ചില്ല എന്നറിഞ്ഞതില്‍ സന്തോഷം.
    Echmu ചേച്ചീ...
    വായനയ്ക്കും കമന്റിനും നന്ദി.

    മുരളി മാഷേ...
    അഭിനന്ദനങ്ങള്‍ക്കും നല്ല വാക്കുകള്‍ക്കും നന്ദി.

    ശ്രീച്ചേട്ടാ...

    :)

    mayflowers...
    നന്ദി ചേച്ചീ

    വീ കെ മാഷേ...
    അതു തന്നേ. നന്ദി

    ചന്ദ്രകാന്തം ചേച്ചീ...
    കുറേ നാളുകള്‍ക്ക് ശേഷമുള്ള സന്ദര്‍ശനത്തിനും കമന്റിനും നന്ദി. :)

  37. nidhee...sh! said...

    അനുഭവങ്ങള്‍ സരസമായി പങ്കു വച്ചു. പത്രോസ് സ്വാമി കീ ജയ്‌.
    ആശംസകള്‍

  38. ഫൈസല്‍ ബാബു said...

    ശ്രീ,,നല്ല പോസ്റ്റ്‌ , നന്നാവണം എന്നു വിചാരിച്ചാലും സമൂഹം അതിനനുവദിക്കാത്ത ഒരു വിഭാഗമാണ് കള്ളന്‍ മാര്‍ , പത്രോസ് പക്ഷെ ആ പരീക്ഷണത്തില്‍ വിജയിച്ചു എന്ന് പറയാം ,നീളം കൂടി എന്ന് ശ്രീ യുടെ കമന്റ് കണ്ടപ്പോഴാണ് ശ്രധിക്കുന്നത് തന്നെ ,,

  39. ‍ആയിരങ്ങളില്‍ ഒരുവന്‍ said...

    അങ്ങനെ പത്രോസിനും മാനസാന്തരം..! രസകരമായി എഴുതി..

  40. kanakkoor said...

    എഴുത്ത് രസകരമായിരുന്നു . നല്ല ഒഴുക്കുള്ള ശൈലി . തുടരുക. നല്ല ഈ രചനക്ക് ആശംസകള്‍ .

  41. Kiran / കിരണ്‍ said...

    നീളക്കൂടുതൽ വായനയെ ബാധിച്ചില്ല, പത്രോസിന്റെ ക്ഷമ സമ്മതിച്ചിരിക്കുന്നു, അമ്മയും പെങ്ങളും ചെയ്തതു കേട്ട് എനിക്ക് അരിശം വന്നു കേട്ടോ :)

  42. ഭാനു കളരിക്കല്‍ said...

    കഥയില്‍ അവിശ്വസനീയമായ വഴിത്തിരുവുകള്‍ ഉണ്ടാകുമ്പോള്‍ കഥ ഇമ്ബമുള്ളതാകുന്നു . ജീവിതവും അങ്ങനെ തന്നെ.

  43. Typist | എഴുത്തുകാരി said...

    ഒരുപാട് നാളായി ശ്രീയുടെ ഒരു പോസ്റ്റ് വായിച്ചിട്ട്. പതിവുപോലെ രസകരം.

  44. ശ്രീ said...

    nidhee...sh! ...
    സ്വാഗതം. വായനയ്ക്കും കമന്റിനും നന്ദി

    ഫൈസല്‍ ബാബു...
    സന്തോഷം. സത്യം തന്നെ ആണ്. പലര്‍ക്കും പത്രോസിനെ പോലെ കഴിയാറില്ല.
    കമന്റിനു നന്ദി.

    ‍ആയിരങ്ങളില്‍ ഒരുവന്‍ ...
    സ്വാഗതം. വായനയ്ക്കും കമന്റിനും നന്ദി മാഷേ.

    kanakkoor ...
    നന്ദി മാഷേ.

    Kiran / കിരണ്‍ ...
    ശരിയാണ് മാഷേ. അയാളുടെ വീട്ടുകാര്‍ ഒട്ടും തന്നെ സപ്പോര്‍ട്ട് ചെയ്തില്ലെന്ന് മാത്രമല്ല, ആവും പോലെ ആ ഉദ്യമത്തില്‍ നിന്ന് അയാളെ തടയാനും ശ്രമിച്ചു. എങ്കിലും പത്രോസ് ആ പരീക്ഷണങ്ങളെല്ലാം അതിജിവിച്ചല്ലോ.
    കമന്റിന് നന്ദി ട്ടോ.

    ഭാനു കളരിക്കല്‍ ...
    ശരിയാണ്, വായനയ്ക്കും കമന്റിനും നന്ദി

    എഴുത്തുകാരി ചേച്ചീ...
    വൈകിയാണെങ്കിലും ഇങ്ങൈത്തിയതിലും വായിച്ച് അഭിപ്രായം രേഖപ്പെടുത്തിയതിലും സന്തോഷം.
    [ഈ പത്രോസിനെ പരിചയമുണ്ടോ... ചേച്ചിയുടെയും അയല്‍ നാട്ടുകാരനായി വരും] :)

  45. നിസാരന്‍ .. said...

    നല്ല കഥ. സംഭവ കഥയാണെങ്കിലും വളരെ നന്നായി ഒരു കഥക്കുള്ള എല്ലാ ക്രാഫ്റ്റൊടെയും പറഞ്ഞ കഥ. പത്രോസ് സ്വാമി എന്തായാലും മനസ്സില്‍ തങ്ങി

  46. കൊച്ചു കൊച്ചീച്ചി said...

    ഞങ്ങളുടെ നാട്ടില്‍ ഒരു 'പൈലി സ്വാമി' ഉണ്ടായിരുന്നു. പൊതുവേ ഫുള്‍ തണ്ണിയും വഴിനീളെ തെറിയുമാണ്. മണ്ഡലക്കാലത്ത് പുള്ളി കമ്പ്ലീറ്റ് സാത്വികന്‍. മലകയറിവന്ന് മാലയൂരിയാല്‍ വീണ്ടും പഴയപടി. ഇതുവായിച്ചപ്പോള്‍ പുള്ളിയെ ഓര്‍ത്തു. ഇപ്പൊ ജീവനോടെയുണ്ടോ ആവോ....

    നന്നായി, ഇഷ്ടപ്പെട്ടു.

  47. Anitha Kappadan Govindan said...

    എനിക്കും ഇഷ്ടായി,പെരുത്ത് !!
    പിന്നെ, ഓളങ്ങളിലെയ്ക്ക്- എന്‍റെ ബ്ലോഗിലേയ്ക്ക്, ഒന്നെത്തിനോക്കിയതിനും താങ്ക്സ്.

  48. വിരോധാഭാസന്‍ said...

    കള്ളന്‍ പത്രോസ് വളരെ മിഴിവുള്ള കഥാപാത്രമായി മുന്നില്‍ നില്‍ക്കുന്നു.. പ്രത്രോസ് സ്വാമിയായി ..!!

    ആശംസകള്‍ ..

  49. പട്ടേപ്പാടം റാംജി said...

    സുഖമായ വായനയില്‍ നീളക്കൂടുതല്‍ അനുഭവപ്പെട്ടതായി തോന്നിയില്ല. പത്രോസിനെപ്പോലെ ചെറിയ കള്ളന്മാര്‍ എല്ലായിടത്തും കാണാം മറ്റു ചില രീതികളോടെ. നല്ലൊരു കഥ പോലെ നാന്നായി തന്നെ അവതരിപ്പിച്ചു. ശബരിമല യാത്രയുടെ ഓരോ ചലനങ്ങളും നന്നായി തന്നെ ചേര്‍ത്തു.
    വളരെ ഇഷ്ടായി.

  50. ഷേര്‍ഷ said...

    നീര്‍മിഴിപ്പൂക്കള്‍ ടൈറ്റില്‍ ഫോണ്ട് എവിടെ കിട്ടും എന്ന് പറഞ്ഞു തരാമോ...

  51. ശ്രീ said...

    നിസാരന്‍ ...
    സ്വാഗതം മാഷേ. വായനയ്ക്കും അഭിപ്രായത്തിനും നന്ദി കേട്ടോ.

    കൊച്ചു കൊച്ചീച്ചി ...
    ആഹാ, പൈലി സ്വാമി ആളു കൊള്ളാലോ :)

    Anitha Kappadan Govindan ...
    സ്വാഗതം. വായനയ്ക്കും കമന്റിനും നന്ദി.
    :)

    വിരോധാഭാസന്‍ ...
    സന്തോഷം, വായനയ്ക്കും കമന്റിനും നന്ദി.

    പട്ടേപ്പാടം റാംജി...
    വളരെ സന്തോഷം മാഷേ. നല്ല വാക്കുകള്‍ക്ക് നന്ദി.

    ഷേര്‍ഷ ...
    സ്വാഗതം. അമ്പതാം കമന്റിനു നന്ദി.
    പിന്നെ, നീര്‍മിഴിപ്പൂക്കള്‍ എന്ന എന്റെ ഈ ബ്ലോഗിന്റെ തലക്കെട്ട് ഡിസൈന്‍ ചെയ്ത് തന്നത് നന്ദപര്‍വ്വം ബ്ലോഗര്‍ നന്ദേട്ടന്‍ ആണ്.
    :)

  52. aswathi said...

    പത്രോസിനു വന്ന മാനസാന്തരം ഇഷ്ടായി ശ്രീ... ആശംസകള്‍

  53. എം.എസ്. രാജ്‌ | M S Raj said...

    പത്രോസിന്റെ ജീവിതം അങ്ങനെ പാറ പോലെ ഉറച്ചതായി. :)

  54. കാളിയൻ - kaaliyan said...

    യഥാർത്ത ദൈവ വിശ്വാസം തെറ്റുകളെ കുറയ്ക്കുകയേ ചെയ്യുകയുള്ളൂ !