Tuesday, August 17, 2010

ഓര്‍മ്മകളിലെ ഓണം

പെയ്തൊഴിയാത്തൊരു മഴയുടെ ഓര്‍‌മ്മകള്‍‌

വിങ്ങും മനസ്സിന്റെ തേങ്ങലുകള്‍...‌

ഓര്‍‌മ്മ തന്‍‌ വീഥിയിലെന്നോ കൈവിട്ട

താരാട്ടുപാട്ടിന്‍‌ സംഗീതമായ്


ഓര്‍‌മ്മകള്‍‌ തേടിയെത്തുന്നു മെല്ലെ

മറവി തന്‍‌ മൂടല്‍‌ മഞ്ഞലിഞ്ഞൂ

വ്യക്തമല്ലെങ്കിലും കേള്‍‌ക്കാമെനിക്കേതോ

തംബുരു തന്‍‌ ശോക ഗാനം


സ്മൃതി നിലാവിലെ നിഴലുകള്‍‌ മാത്രമായ്

പോയ കാലത്തിന്റെ കാല്‍‌പ്പാടുകള്‍‌

ഇന്നലെയെന്നിലോ മൊട്ടിട്ട സ്വപ്നങ്ങള്‍‌

ഇനിയും വിടരാത്ത പുഷ്പങ്ങളായ്


ഉത്രാട രാത്രിയില്‍‌ ഉല്ലാസവേളയില്‍‌

ഓണ നിലാവിന്റെ ഓര്‍‌മ്മകളില്‍‌

ഇന്നെന്റെയാത്മാവില്‍‌ കേവലം സ്പന്ദനം

മാത്രമായ് തീര്‍‌ന്നൊരെന്‍‌ ബാല്യകാലം.