Wednesday, October 20, 2021

നിരീശ്വരൻ

 

പുസ്തകം   : നിരീശ്വരൻ

രചന            : വി ജെ ജയിംസ്

പ്രസാധകർ : ഡി സി ബുക്ക്സ്

പേജ്             : 320

വില               : 340


കേരള സാഹിത്യ അക്കാദമി അവാർഡും വയലാർ അവാർഡും നേടിയ കൃതിയാണു വി ജെ ജയിംസിന്റെ നിരീശ്വരൻ.


വിശ്വസങ്ങളും അന്ധ വിശ്വാസങ്ങളും തമ്മിൽ ഉള്ള വ്യത്യാസം എന്നത് വളരെ നേർത്തതാണെന്നും അത് എങ്ങനെയൊക്കെ ആണ് ജനജീവിതത്തിൽ മാറ്റങ്ങൾ ഉണ്ടാക്കുന്നത് എന്നും ഒരു നാടിന്റെ തന്നെ മുഖച്ഛായ തന്നെ മാറ്റുന്നത് എന്നും ഈ നോവൽ നമുക്ക് കാണിച്ചു തരുന്നു.


 'ആഭാസ'ന്മാർ എന്നു സ്വയം വിശേഷിപ്പിയ്ക്കുന്ന... ആന്റണി, ഭാസ്കരൻ, സഹീർ എന്നീ മൂന്നു ആത്മ സുഹൃത്തുകളിലൂടെയാണു കഥ വികസിയ്ക്കുന്നത്.   യുക്തിയെ ചോദ്യം ചെയ്യുന്ന ആ നാട്ടിലെ ജനങ്ങളുടെ അന്ധമായ ഈശ്വര വിശ്വാസത്തെ തകിടം മറിയ്ക്കാൻ അവർ കല്പിച്ചു കൂട്ടി ഉണ്ടാക്കി എടുക്കുന്ന ഒരു വിപരീത ദേവൻ ആണ് നിരീശ്വരൻ. 


നാട്ടിലെ എറ്റവും ശ്രദ്ധേയമായ, തലമുറകളുടെ സംഗമ സ്ഥലമായ ആൽ-മാവിൻ ചുവട്ടിലെ നിരീശ്വര പ്രതിഷ്ഠയും പിന്നീട് ഈശ്വരന്മാരുടെയും ഈശ്വരൻ ആയി നിരീശ്വരൻ മാറുന്നതും അതെ തുടർന്നുണ്ടാകുന്ന അപ്രതീക്ഷിത സംഭവങ്ങളും ആണ് നോവലിന്‍റെ  ഇതിവൃത്തം. 


ആന്റണി, ഭാസ്കരൻ, സഹീർ ത്രയത്തിനു തൊട്ടു മുൻപിലത്തെ തലമുറക്കാരായ അർണോസ് (പാതിരി), സെയ്ദ് (മൗലവി), ഈശ്വരൻ എമ്പ്രാന്തിരി എന്നീ സുഹൃത്തുക്കളുടെ ജീവിതവും അവരുടെ മറ്റൊരു സുഹൃത്ത് ആയ ഇന്ദ്രജിത്തിന്റെ ശാസ്ത്രത്തെ പോലും വെല്ലുവിളിയ്ക്കുന്ന അത്ഭുത രോഗശാന്തിയും തുടര്ന്നുള്ള പ്രതിസന്ധികളും വളരെ നന്നായി നോവലിൽ അവതരിപ്പിച്ചിരിയ്ക്കുന്നു.


 ശാസ്ത്രജ്ഞനായ റോബെർട്ടോയുടെ ഗന്ധശാസ്ത്ര പരീക്ഷണങ്ങൾ, റോബർട്ടോയുടെ സൗഹൃദം ആ നാട്ടിലെ നാട്ടു വേശ്യ എന്നറിയപ്പെട്ടിരുന്ന ജാനകിയിൽ വരുത്തുന്ന മാറ്റങ്ങൾ, വഴക്കാളിയായി അറിയപ്പെട്ടിരുന്ന ഘോഷയാത്ര അന്നാമ്മയുടെ പരിവർത്തനം എന്നിങ്ങനെ അന്നാമ്മയുടെ അമ്മിണി പശു പൊലും വായനക്കാരുടെ ഹൃദയം സ്പർശിയ്ക്കാതെ കടന്നു പോകില്ല. 


ഓരോരുത്തരുടെയും മറ്റുള്ളവരോടുള്ള  കാഴ്ചപ്പാട് എങ്ങനെയെല്ലാം വ്യത്യാസപ്പെടുന്നു എന്നും വിശ്വാസം ആയാലും അവിശ്വാസം ആയാലും രണ്ടിലും പൊതുവായുള്ളത് അതിൽ വിശ്വസിയ്ക്കുക എന്നത് ആണെന്നും  നിരീശ്വരൻ നമുക്ക്  മനസ്സിലാക്കി തരുന്നു. 


- ശ്രീ

Friday, September 10, 2021

ഘാതകന്‍

പുസ്തകം : ഘാതകന്‍

രചന : കെ ആർ മീര

പ്രസാധകർ : കറന്റ് ബുക്ക്സ്

പേജ് : 564

വില : 550


"ഖുച്ചി രുവാ, സത്യപ്രിയാ, ഖുച്ചീ രുവാ.. മത്തെ ഫുല്ലിബെ നായീ.. ബിക്കോസ് ദെയർ ഈസ് ആൾവെയ്സ് അനദർ ചാൻസ്!"


ഒരുൾക്കിടിലത്തോടെയാകും ഓരോ തവണയും വായനക്കാർ ഈ വരികൾ ആവർത്തിച്ചു വായിച്ചിട്ടുണ്ടാകുക. ഒറ്റയടിയ്ക്ക് കഥയുടെ ഗിയർ മാറുന്ന ഒരു ഫീൽ.


 ശ്വാസം അടക്കിപ്പിടിച്ചിരുന്നു, ഒറ്റയിരുപ്പിന് തന്നെ വായിച്ചു തീർക്കാൻ പ്രേരിപ്പിയ്ക്കുന്ന ഒരു സസ്പെൻസ് ത്രില്ലർ ആണ് കെ ആർ മീര യുടെ എറ്റവും പുതിയ നോവൽ ആയ "ഘാതകൻ" എന്നു പറയാം.


 2016 നവംബർ 8 ലെ നോട്ടുനിരോധനത്തിനു 8 ദിവസങ്ങൾക്ക് ശേഷം നവംബർ 16ന് ഒരു വധശ്രമത്തിൽ നിന്ന് വിസ്മയകരമാം വിധം തലനാരിഴയ്ക്ക് രക്ഷപ്പെടുന്ന സത്യപ്രിയ... എന്തിന് ഒരാൾ തന്നെ വധിയ്ക്കണം എന്ന ചോദ്യത്തിന് പിറകെ  തൻ്റെ ഘാതകനെ അന്വേഷിച്ച് സഞ്ചരിക്കേണ്ടി വരുന്ന സത്യപ്രിയയുടെ കഥ. ചുരുക്കി പറഞ്ഞാൽ അതാണ് ഘാതകൻ. ആ യാത്രയിൽ സത്യപ്രിയയുടെയും അവളുമായ് ബന്ധമുള്ള ഒരുപിടി കഥാപാത്രങ്ങളുടെയും ഭൂതകാലം വായനക്കാർക്ക് മുൻപിൽ ചുരുളഴിയുന്നു. 


വളരെ ചെറിയ പ്രായം മുതൽ കാണരുതാത്തതും കേൾക്കരുതാത്തതും ആയ സത്യങ്ങൾ കണ്ടും കേട്ടും വളരേണ്ടി വരുന്ന ഒരു പെൺകുട്ടി.  ഓരോ കാലഘട്ടത്തിൽ അവൾ അനുഭവിയ്ക്കുന്ന ദുരിതങ്ങളും അവജ്ഞകളും പരിഹാസങ്ങളും ദാരിദ്ര്യവും തന്നെ ആകും അവളെ ഏതവസ്ഥയിലും കുലുങ്ങാത്ത, അതിശക്തയായ ഒരു കഥാപാത്രമാക്കി മാറ്റുന്നത്. 


അതേ പോലെ സത്യപ്രിയയുടെ അമ്മയും അച്ഛനും. ഒരച്ഛൻ എങ്ങനെ ആകരുത് എന്ന് വ്യക്തമായി കാണിച്ചു തരുന്നതിനോടൊപ്പം ആരും ആഗ്രഹിയ്ക്കുന്ന ഒരമ്മ ആയിട്ടാണ് സത്യയുടെ അമ്മ വസന്തലക്ഷ്മി യെ നോവലിസ്റ്റ് നമുക്ക് മുന്നിൽ  ആണു അവതരിപ്പിയ്ക്കുന്നത്. നമ്മുടെ മനസ്സിനു എറ്റവും സന്തോഷം തരുന്ന കഥാപാത്രം എന്നു സംശയമേതുമില്ലാതെ പറയാം.  എത്ര വലിയ തടസ്സങ്ങളെയും വളരെ ലാഘവത്തോടെ, ആത്മ സംയമനത്തോടെ നേരിടാനും, വിധിയെ പഴിച്ചു വിഷമിയ്ക്കാതെ സാധ്യമായ എല്ലാ രീതികളിലും നമ്മെ ജീവിച്ചു കാണിയ്ക്കുവാനും കഴിയുന്ന    ആകർഷകമായ ഒരു  കഥാപാത്രം. 


എന്നും നല്ല വായനകൾ മലയാളികൾക്ക് സമ്മാനിച്ചിട്ടുള്ള കെ ആർ മീരയുടെ,  വളരെ മികച്ച വായനാനുഭവം തരുന്ന ഒന്നാണ് എറ്റവും പുതിയ ഈ നോവൽ. ഉപയോഗിച്ചിരിയ്ക്കുന്ന  അവതരണ ശൈലിയും വ്യത്യസ്തമായി തോന്നി.


- ശ്രീ

Friday, August 20, 2021

പർവ്വതങ്ങളും മാറ്റൊലി കൊള്ളുന്നു


പുസ്തകം   : പർവ്വതങ്ങളും മാറ്റൊലി കൊള്ളുന്നു

രചന            : ഖാലിദ് ഹോസൈനി

പ്രസാധകർ : ഡി സി ബുക്ക്സ്

പേജ്             : 464

വില               : 499


പട്ടം പറത്തുന്നവൻ, തിളക്കമാർന്ന ഒരായിരം സൂര്യന്മാർ എന്നീ പ്രശസ്തമായ കൃതികൾക്ക് ശേഷം വന്ന ഖാലിദ് ഹോസൈനിയുടെ മറ്റൊരു മനോഹരമായ നോവൽ ആണ് 'പർവ്വതങ്ങളും മാറ്റൊലി കൊള്ളുന്നു'.


 നോവൽ ആരംഭിയ്ക്കുന്നത്  അബ്ദുള്ളയ്ക്കും പരിക്കും അവരുടെ പിതാവ് സാബൂർ പറഞ്ഞു കൊടുക്കുന്ന ഒരു ദീവിന്റെ കഥയിലൂടെയാണ്. മൈതാൻ സബ്സ് എന്ന ഗ്രാമത്തിൽ നിന്ന് ഒരു കർഷകന്റെ എറ്റവും പ്രിയപ്പെട്ട ഇളയ മകനെ ഒരു ദീവ്  പിടിച്ചു കൊണ്ടുപോകുന്നതായിരുന്നു കഥ.  


ആ കഥ കുഞ്ഞു പരിയെയും അവളുടെ പ്രിയപ്പെട്ട ജ്യേഷ്ഠൻ അബ്ദുള്ളയേയും അവരുടെ ജീവിത കഥയാക്കുമെന്ന് അവരറിഞ്ഞിരുന്നില്ല.


ഇവരുടെ സഹോദര സ്നേഹത്തിൽ നിന്ന് അജിന്റെ ആഴങ്ങളെ തോറ്റു കൊണ്ട്, വായനക്കാരുടെ ഹൃദയത്തെ മുറിവെൽപ്പിച്ചു  കൊണ്ട് ആണ്  ഖാലിദ്‌ ഹുസൈനിയുടെ പർവതങ്ങളും മാറ്റൊലി കൊള്ളുന്നു എന്ന രചന മുന്നേറുന്നത്.



എന്നാൽ മുൻ രചനകളിൽ നിന്ന് വ്യത്യസ്തമായി രണ്ടോ മൂന്നോ പ്രധാന കഥാപാത്രങ്ങളിൽ ചുരുക്കാതെ ഒരുപാട് ജീവിതങ്ങളെ കൂടി കഥയിൽ ഉടനീളം പരിചയപ്പെടുത്തുന്നുണ്ട്, കഥാകൃത്ത് .



 മുൻ നോവലുകളിൽ എന്ന പോലെ അഫ്ഗാനിസ്താനിലെ രാഷ്ട്രീയാവസ്ഥയും  ജന ജീവിതവും ഇതിലും കടന്നുവരുന്നുണ്ട്. എന്നാൽ  മറ്റു രാജ്യങ്ങളിലെയ്ക്കും അവിടങ്ങളിലെ കഥാപാത്രങ്ങളിലെയ്ക്കും അവരുടെ ജീവിത ശൈലിയിലെയ്ക്കും കൂടി വ്യാപിയ്ക്കുന്നുന്നുണ്ട് ഇത്തവണ .


ഖാലിദ് ഹൊസൈനിയുടെ ആഖ്യാനശൈലി തന്നെ ആണ് ഈ കൃതിയുടെയും ആത്മാവ്. വായനക്കാരെ അവസാനം വരെ പിടിച്ചിരുത്താനും ഓരോ കഥാപാത്രങ്ങൾക്കും ഒപ്പം മനസ്സ് കൊണ്ട് സഞ്ചരിയ്ക്കാനും നമുക്ക് കഴിയും എന്നു തീർച്ച.


- ശ്രീ