മഹാത്മാഗാന്ധി എട്ട് പതിറ്റാണ്ടുകൾക്ക് മുൻപ് ആഹ്വാനം ചെയ്ത പല കാര്യങ്ങളും കേട്ടപ്പോൾ അന്ന് ബ്രിട്ടീഷുകാർ ഞെട്ടിയിട്ടുണ്ടാകും... പക്ഷേ, ഇന്ന് നമ്മൾ ജീവിക്കുന്ന ജീവിതം അദ്ദേഹം ആഗ്രഹിച്ചിരുന്നത് പോലെ ആണോ?
ഏകദേശം 80 കൊല്ലം മുമ്പ് അദ്ദേഹം നമുക്ക് സ്വാതന്ത്ര്യം നേടി തന്നത് അദ്ദേഹത്തിൻ്റേതായ ചില സമരമുറകളിലൂടെ ആയിരുന്നല്ലോ... എന്നാൽ ഇന്നത്തെ കാലത്ത് നമ്മൾ അത് എങ്ങനെയാണ് ഫോളോ ചെയ്യുന്നത് ?
അന്ന് "സത്യമേവ ജയതേ", ഇന്ന് "സത്യം പറയണം...പക്ഷേ കണ്ടീഷൻസ് അപ്ലൈഡ്!"
അന്ന് 'യാതൊരു കാരണവശാലും അസത്യം പറയരുത്, സത്യം മാത്രമാണ് ദൈവം' എന്ന് അദ്ദേഹം നമ്മെ പറഞ്ഞു പഠിപ്പിച്ചെങ്കിൽ ഇന്ന് നമ്മൾ സത്യം മാത്രം പറഞ്ഞാൽ ലൈഫിൽ സർവൈവ് ചെയ്യാൻ പറ്റില്ല എന്ന് തിരിച്ചറിയുന്നു.
ഇന്ന് സത്യം പറയുന്നത് ഓഫീസിലോ സോഷ്യൽ മീഡിയയിലോ പോയിട്ട് സ്വന്തം വാട്സാപ്പ് സ്റ്റാറ്റസിൽ പോലും ഉണ്ടാകുമോ? AI ഫിൽട്ടർ ഇട്ട ഫോട്ടോകൾ "സത്യം മാത്രം" ആണോ പറയുന്നത് എന്നു മാത്രം ഓർത്താൽ മതി.
അന്ന് "അഹിംസ ആണ് യഥാർത്ഥ ശക്തി", ഇന്ന് "അഹിംസ വാക്കുകളിൽ മാത്രം"
കണ്ണാടിക്ക് പകരം കണ്ണെടുക്കാൻ പോയാൽ ലോകം മുഴുവൻ അന്ധതയിലാകും എന്ന് അദ്ദേഹം അന്നേ തിരിച്ചറിഞ്ഞിരുന്നു.
പക്ഷെ, ഇന്ന് നമ്മൾ നിയമത്തെയും പൊലീസിനെയും പേടിച്ച് ഒരു പക്ഷേ, നേരിട്ട് ഒരാളെ അടിക്കില്ല, പക്ഷേ ഓൺലൈനിൽ ഇട്ട് അലക്കും. സോഷ്യൽ മീഡിയ കമന്റ് ബോക്സുകളിൽ ചെന്ന് നമ്മൾ നടത്തുന്ന സൈബർ ബുള്ളിയിംഗ് കണ്ടാൽ അഹിംസ എന്ന വാക്കിന്റെ അർത്ഥം തന്നെ മാറ്റി എഴുതേണ്ടി വരും. ഒരാൾ നമുക്കിഷ്ടമല്ലാത്ത അഭിപ്രായം പറഞ്ഞാൽ പിന്നെ താഴെ തെറിയുടെ പൂരം ആയിരിക്കും.
"സത്യം മാത്രം പറയുക" എന്ന ഗാന്ധിജിയുടെ ഉപദേശം ഒരു രാഷ്ട്രീയ പ്രവർത്തകൻ സ്വീകരിച്ചാൽ അയാൾ ഒറ്റ ദിവസം കൊണ്ട് പാർട്ടിക്ക് പുറത്താകും.
അന്ന് "ലളിത ജീവിതം", ഇന്ന് "ആഘോഷ ജീവിതം"
അന്ന് 'മനുഷ്യന് ആവശ്യത്തിനുള്ളത് ലോകത്തിലുണ്ട്, പക്ഷേ ആർത്തിക്കുള്ളതില്ല' എന്ന് നമ്മെ ആവർത്തിച്ച് ഓർമ്മിപ്പിച്ചിരുന്നു അദ്ദേഹം.
ഇന്ന് നമ്മൾ ഒരു ഓഫർ കണ്ടാൽ, അത് നമുക്ക് ആവശ്യമുണ്ടെങ്കിലും ഇല്ലെങ്കിലും വാങ്ങിക്കൂട്ടും. ചർക്ക തിരിച്ചു തുണിയുണ്ടാക്കി, തുച്ഛമായ വസ്ത്രങ്ങൾ മാത്രം ഉപയോഗിച്ച ഒരു മനുഷ്യന്റെ നാട്ടിലാണ് നമ്മൾ ബിഗ് ബില്യൺ ഡേ എന്നും ഗ്രാൻഡ് ഗ്രേറ്റ് ഇന്ത്യൻ സെയിൽ എന്നും പറഞ്ഞ് ക്രെഡിറ്റ് കാർഡ് തേഞ്ഞു തീരുന്നത് വരെ ഷോപ്പിംഗ് നടത്തുന്നത്! സ്വദേശി പ്രസ്ഥാനത്തെ പ്രോത്സാഹിപ്പിച്ച അദ്ദേഹം ഇന്നത്തെ നമ്മുടെ നിത്യോപയോഗ സാധനങ്ങൾ കണ്ടാലത്തെ അവസ്ഥ!
'മിനിമലിസം'എന്നൊക്കെ പറഞ്ഞ് ഇൻസ്റ്റാ പോസ്റ്റ് ഇടും, പക്ഷെ വീട്ടിൽ സാധനങ്ങൾ വയ്ക്കാൻ സ്ഥലം തികയുന്നുണ്ടാകില്ല.
അന്ന് "ശുചിത്വം ദൈവികമാണ്, സ്വന്തം വീടും പരിസരവും വൃത്തിയാക്കണം", ഇന്ന് "എന്റെ വീട് ക്ലീൻ ആയിരിക്കണം, റോഡ് പക്ഷേ, പഞ്ചായത്തിന്റെ വകയാണ്!"
ഗാന്ധിജി സ്വന്തം ടോയ്‌ലറ്റ് വരെ വൃത്തിയാക്കി മാതൃക കാണിച്ചു. നമ്മളോ? വീട് തുടച്ച് വൃത്തിയാക്കി, ആ മാലിന്യം മുഴുവൻ ഒരു പ്ലാസ്റ്റിക് കവറിലാക്കി അർദ്ധരാത്രി പറമ്പിലേക്കോ വഴിയോരത്തേക്കോ എറിയും! ശുചിത്വ ബോധം ഉണ്ട്, പക്ഷേ അത് വീടിന്റെ കോമ്പൗണ്ട് വാൾ വരെ മാത്രം.
ഗാന്ധിജി സമരമുറയായി, ഒരു കാര്യസാധ്യത്തിനായി പട്ടിണി കിടന്നപ്പോൾ, നമ്മൾ 'തടി കുറയ്ക്കാൻ' പട്ടിണി കിടക്കുന്നു.
നമ്മൾ ഗാന്ധിജിയുടെ ചിത്രങ്ങൾ ഭിത്തിയിൽ തൂക്കി, അദ്ദേഹത്തിന്റെ ഉദ്ധരണികൾ ക്യാപ്ഷൻ ആക്കി മാറ്റിയതല്ലാതെ, അദ്ദേഹം പറഞ്ഞതിൽ ഒരു 10% എങ്കിലും ജീവിതത്തിൽ പകർത്തുന്നുണ്ടോ എന്ന് ചോദിച്ചാൽ ഞാനുൾപ്പെടെ ഉള്ള തലമുറ ഇത് പോലെ ഒരു ഗാന്ധി ജയന്തി വരുമ്പോൾ ഇതൊക്കെ ഇങ്ങനെ പറയും എന്നല്ലാതെ അത് പ്രാബല്യത്തിൽ കൊണ്ട് വരുന്നില്ല എന്ന് സമ്മതിക്കേണ്ടി വരും. നമ്മൾ ഗാന്ധിജിയെ ഗാന്ധിജയന്തി ദിനത്തിലും 500 രൂപ നോട്ടിലും ഒക്കെ ഒതുക്കി നിർത്തിക്കഴിഞ്ഞു. അദ്ദേഹത്തിന്റെ കണ്ണടയും വടിയും നമ്മൾ ഐക്കൺ ആക്കി മാറ്റി, പക്ഷേ അദ്ദേഹം മുന്നോട്ട് വെച്ച ചിന്തകളെ ഒക്കെ സൗകര്യപൂർവ്വം മാറ്റി വച്ചു. അദ്ദേഹം പഠിപ്പിച്ച ആദർശങ്ങൾ ഇന്നു പ്രസക്തമല്ല എന്നല്ല, അത് പ്രാവർത്തികമാക്കാൻ നമുക്ക് കഴിയുന്നില്ല എന്നതാണ് സത്യം.
മറ്റുള്ളവരോടുള്ള സഹിഷ്ണുതയും, സത്യസന്ധതയും, ലളിത ജീവിതവും ഇന്നത്തെ ലോകത്ത് അപ്രായോഗികം എന്ന് തോന്നാം. എങ്കിലും, ഒന്ന് ശ്രമിച്ചു നോക്കാം... വലിയ കാര്യങ്ങൾ ഒന്നുമല്ല, ചുറ്റുമുള്ളവരോട് കുറച്ചുകൂടി സത്യസന്ധതയും, സഹിഷ്ണുതയും കാണിച്ചാൽ തന്നെ നമ്മൾ നമ്മളോടും നമ്മുടെ രാജ്യത്തോടും സഹജീവികളോടും ചെയ്യുന്ന വലിയൊരു നീതിയായിരിക്കും!
ശ്രീ
0 comments:
Post a Comment