അനാഥൻ

 പുസ്തകം :  അനാഥൻ 

രചയിതാവ് / എഡിറ്റർ : ശശി വാര്യർ

പരിഭാഷ : പി കെ വാസുദേവൻ നായർ

വിഭാഗം :  നോവൽ 

ഭാഷ : മലയാളം

പ്രസാധകർ :  പൂർണ്ണ പബ്ലിക്കേഷൻസ്

പേജ് : 396

വില : 200

Rating : 4/5

പുസ്തക പരിചയം :

കമാൻഡോ ഓപ്പറേഷനുകളാൽ സമ്പന്നമായ 'അണലി' എന്ന തന്റെ ത്രില്ലറിനു ശേഷം ശശി വാര്യർ എഴുതിയ പുസ്തകം ആണ് അനാഥൻ.  ഒരു ത്രില്ലറിനു യോജിച്ച പേര് ആണോ ഇത് എന്ന് വായനക്കാർക്ക് സംശയം തോന്നിയേക്കാമെങ്കിലും കഥയിൽ ആ പേരിന്റെ പ്രസക്തി പരിഗണിച്ചിട്ടാകാം അതേ പേര് തന്നെ പുസ്തകത്തിനും കൊടുത്തിരിയ്ക്കുന്നത്.

'അണലി' എന്ന കഥയിലെ നായകൻ ആയ കേണൽ രാജൻ മേനോൻ അഥവാ രാജ തന്നെ ആണ് ഈ കഥയിലും നായകൻ. അദ്ദേഹത്തിനു ഇപ്പോ മുപ്പത്തിയെട്ടു വയസ്സു കഴിഞ്ഞു. കമാൻഡോ സേനയിലെ തന്റെ നല്ലകാലം പിന്നിട്ടു കഴിഞ്ഞോ എന്ന് അദ്ദേഹം ഇടയ്ക്ക് ചിന്തിച്ചും തുടങ്ങി. എങ്കിലും അദ്ദേഹത്തിന്റെ വിദഗ്ധ സേവനം മിലിട്ടറി ഉപയോഗപ്പെടുത്തിക്കൊണ്ടേ ഇരിയ്ക്കുകയാണ്. 

കഥ തുടങ്ങുന്നത് പാക് അധിനിവേശ കാശ്മീരിൽ തടവിൽ വച്ചിരുന്ന ഒരു അമേരിക്കൻ ടൂറിസ്റ്റിനെ മോചിപ്പിച്ച്  ഇന്ത്യയിൽ കൊണ്ടു വരാൻ ഉള്ള ഉദ്ധ്യമത്തോടെ ആണ്. വിജയകരമായി ആ ദൗത്യം പൂർത്തീകരിയ്ക്കുന്ന കേണൽ രാജയ്ക്ക് മണിക്കൂറുകൾ തികയുന്നതിനു മുൻപ് വീണ്ടുമൊരു പ്രതിസന്ധിയെ നേരിടേണ്ടിവരുന്നു. 

 പ്രധാനമന്ത്രിയുടെ കൊച്ചു മകളെ ഭീകരന്മാർ റാഞ്ചിക്കൊണ്ടു പോയിരിക്കുന്നു. രാജ അതിസൂക്ഷ്മതയോടെ തയ്യാറാക്കുന്ന പദ്ധതിയിൽ മന്ത്രി സഭയുടെയും ഉപദേശക കമ്മറ്റിയുടെയും ഇടപെടലുകൾ കാരണം പല വിട്ടു വീഴ്ചകൾ വേണ്ടി വരുന്നു.  അവസാനം രണ്ടും കല്പ്പിച്ച് ഇന്ത്യൻ സേനയുടെ കമാൻഡോ വിഭാഗമായ സെപ്ഷ്യൽ ഓപ്പറേഷൻസ് ഫോഴ്സ് (എസ്.ഒ.എഫ്) ഭീകരന്മാരുടെ താവളം ആക്രമിക്കുന്നു. 

പക്ഷെ, തീർത്തും അപ്രതീക്ഷിതമായി രാജയുടെ പദ്ധതി പാളിപ്പോകുന്നു. ഗുരുതരമായ പരിക്കുകളോടെ രാജ കഷ്ടിച്ചു രക്ഷപ്പെടുന്നു.

ട്രീറ്റ്മെന്റിൽ മൃതപ്രായനായി കഴിയുമ്പോൾ ആണ് കുറ്റം മുഴുവനും തന്റെ ചുമലിൽ കെട്ടി വയ്ക്കപ്പെട്ടിരിയ്ക്കുന്നു എന്നും പരിക്കുകൾ ഭേദമായാൽ ചെയ്യാത്ത കുറ്റങ്ങൾക്ക് താൻ ബലിയാടാകാൻ പോകുകയാണ് എന്നും അദ്ദേഹം മനസ്സിലാക്കുന്നത്. എങ്ങനെയെങ്കിലും തന്റെ സൽപ്പേര് വീണ്ടെടുക്കണമെന്ന് ദൃഢനിശ്ചയം ചെയ്യുന്ന രാജ ആരോരുമറിയാതെ ആശുപത്രിയിൽ നിന്നും പോലീസിന്റെ കണ്ണു വെട്ടിച്ച് രക്ഷപ്പെടുന്നു.

 ഓപ്പറേഷന്റെ പരാജയകാരണം രാജയും ഭീകരന്മാരുമായുള്ള ഒരു ഒത്തുകളിയാണെന്ന നിഗമനത്തിൽ പോലിസും രഹസ്യാന്വേഷണ വിഭാഗക്കാരും അദ്ദേഹത്തെ വേട്ടയാടാൻ തുടങ്ങുന്നു. സത്യം കണ്ടെത്താനുള്ള  രാജയുടെ അന്വേഷണം അയാളെ കൊണ്ടെത്തിച്ചത്  പതിറ്റാണ്ടുകൾക്ക് മുൻപ് നടന്ന ഇന്ത്യൻ പൊളിറ്റിക്സിലെ ഒരു ഭയങ്കര വഞ്ചനയുടെ പിന്നാമ്പുറങ്ങളിലാണ്. 

അവസാന പേജ് വരെ സസ്പെൻസ് നിറഞ്ഞു നിൽക്കുന്ന മറ്റൊരു ത്രില്ലർ...

- ശ്രീ