ഓണം... പൊന്നോണം

2007 ആഗസ്ത് 17. വെള്ളിയാഴ്ച. കൊല്ലവര്‍‌ഷം 1183 ചിങ്ങം 1.

വീണ്ടും ലോകമെമ്പാടുമുള്ള മലയാളികളുടെ ഇടയിലേയ്ക്ക് ഒരു ഓണക്കാലം കൂടെ വന്നെത്തുകയാണ്… നന്മയുടെ പ്രതീകമായ ഒട്ടനേകം ഓര്‍‌മ്മകളുടെ പ്രതീകമായ ഓണം. എന്നും ഓണവും ഓണക്കാലവും ഏതൊരു മലയാളിയ്ക്കും ഗൃഹാതുരത്വം തോന്നിപ്പിക്കാറുണ്ട്. എനിക്കും വ്യത്യസ്തമല്ല. ഓരോ ഓണക്കാലത്തും ഞാനോര്‍‌ക്കും ആ പഴയ ബാല്യകാലം…പരീക്ഷാ തിരക്കിലും സമയം കണ്ടെത്തി തുമ്പപ്പൂവും കോളാമ്പിപ്പൂവും കൂട്ടുകാരോടൊത്ത് മത്സരിച്ചു പറിച്ചിരുന്ന ആ കാലം… അത്തം മുതല്‍‌ പത്തു ദിവസം പൂക്കളമിട്ട് ആഘോഷത്തോടെ കാത്തിരുന്ന ആ പഴയ ഓണക്കാലം.

ഇന്ന് ഈ തിരക്കുകള്‍‌ക്കിടയില്‍‌ പഴയ ഓണക്കാലം ഓര്‍‌മ്മകളില്‍‌ മാത്രമാകുകയാണ്. ഓണപ്പാട്ടുകളുടെയോ പൂവിളികളുടെയോ ആരവങ്ങളില്ലാതെ പൂക്കളങ്ങളുടെയോ ഓണക്കളികളുടെയോ സാന്നിദ്ധ്യമില്ലാത്ത ഓണം… മലയാള നാടു വിട്ട് ദൂരദേശങ്ങളില്‍‌ മാത്രമിരുന്ന് ഓണത്തിന്റെ ഓര്‍‌മ്മകള്‍ അയവിറക്കുന്ന എല്ലാ മലയാളികള്‍‌ക്കും സമര്‍‌പ്പിച്ചു കൊണ്ട് ഈ ഓണക്കാലത്തിനു വേണ്ടി സമര്‍‌പ്പിക്കുകയാണ് ഞാന്‍‌ ഈ പോസ്റ്റ്.