Monday, February 13, 2023

ഓറഞ്ചു തോട്ടത്തിലെ അതിഥി

 പുസ്തകം:  ഓറഞ്ചു തോട്ടത്തിലെ അതിഥി

രചയിതാവ് / എഡിറ്റർ :  ലാജോ ജോസ്

വിഭാഗം: ഡോമെസ്റ്റിക് ത്രില്ലർ

ഭാഷ: മലയാളം

പ്രസാധകർ: മാതൃഭൂമി ബുക്സ് 

പേജ്: 200

വില: 300


പതിവ് കുറ്റാന്വേഷണ നോവൽ എന്ന ലേബലിൽ നിന്ന് വ്യത്യസ്തമായി "കുറ്റകൃത്യവാസനയുള്ള മനുഷ്യരുടെ കഥ" എന്നാണു കഥാകൃത്ത് ലാജോ ജോസ് തന്റെ പുതിയ നോവലിനെ വിശേഷിപ്പിച്ചിരിക്കുന്നത്. അത് ഏറെക്കൂറെ കൃത്യമാണ് എന്ന് നോവൽ വായിയ്ക്കുന്ന ആരും സമ്മതിയ്ക്കും എന്ന് തോന്നുന്നു. 'കൊലപാതകവും അന്വേഷണവും കൊലപാതകിയെ കണ്ടെത്തലും' എന്ന സ്ഥിരം മലയാള കുറ്റാന്വേഷണ നോവൽ ശൈലിയിൽ  നിന്നുമുള്ള വേറിട്ട ഒരു യാത്ര തന്നെ ആണ് ഈ കൃതി. ആ സ്റ്റൈലിൽ ഉള്ള ത്രില്ലറുകൾ ആണ് കൂടുതൽ ഇഷ്ടമെങ്കിലും ഇടയ്ക്ക് ഇത്തരം  വ്യത്യസ്തതകൾ തീർച്ചയായും അഭിനന്ദനാർഹം തന്നെയാണ്. 


ഒറ്റയിരിപ്പിന് വായിച്ചു തീര്ക്കാൻ പ്രേരിപ്പിയ്ക്കുന്ന എല്ലാ ഘടകങ്ങളും അടങ്ങിയ ഈ നോവൽ കുറ്റവാളികളുടെ  മനസ്സിലൂടെയുള്ള ഒരു യാത്രയും കൂടിയാണ്. ഓരോ ആദ്ധ്യായങ്ങളിലായി വിവേക്, അനുപമ, ജോഷ്വ എന്നീ കഥാപാത്രങ്ങളിലൂടെ കുറ്റകൃത്യങ്ങളുടെ  മനോവിചാരങ്ങളിലേക്ക് എഴുത്തുകാരൻ വായനക്കാരനെ കൂട്ടിക്കൊണ്ടു പോകുന്നു.  കുട്ടിക്കാലം മുതൽ ചെയ്യുന്ന, പിടിയ്ക്കപ്പെടാത്ത ഓരോ തെറ്റുകളും അടുത്തതായി അതിലും വലുത് എന്തോ ചെയ്യാനുള്ള  ആത്മവിശ്വാസം വർദ്ധിപ്പിക്കും എന്നത് സത്യമാണെന്നും അങ്ങനെ നോക്കിയാൽ നമ്മുടെ ഓരോരുത്തരുടെയും ഉള്ളിന്റെയുള്ളിൽ ഓരോ കൊച്ചു ക്രിമിനലുകൾ ഉറങ്ങിക്കിടപ്പില്ലേ എന്നു പോലും ഈ നോവൽ വായിയ്ക്കുമ്പോൾ നാം ഒരു ഞെട്ടലോടെ ചിന്തിച്ചു കൂടായ്കയില്ല.  


കഥയെ കുറിച്ചു അധികമൊന്നും പറയാൻ നിവൃത്തിയില്ല. അത് വായനയുടെ ഹരം കളഞ്ഞേക്കും.  എങ്കിലും ജോഷ്വ, ദുർഗ്ഗ എന്നീ കഥാപാത്രങ്ങളെ ഹൈലൈറ്റ് ചെയ്യാതെ വയ്യ. ചില സീനുകൾ visualize ചെയ്ത് നോക്കുമ്പോൾ  ശരിയ്ക്ക് ത്രിൽ തോന്നിപ്പിയ്ക്കുന്നുണ്ട്. അവസാന വരി വരെ വായനക്കാരെ പിടിച്ചിരുത്തുന്നുണ്ട് ഈ നോവൽ. 


(ഓഫ്: പണ്ടു കമൽ മുന്തിരിത്തോപ്പുകളുടെ അതിഥി എന്ന പേരിൽ, പേരിനെ അന്വർത്ഥമാക്കുന്ന പശ്ചാത്തലത്തിൽ ഒരു സിനിമ പ്ലാൻ ചെയ്തിരുന്നു എന്ന് വായിച്ചത് ഓർക്കുന്നു. ആ വർക്ക് ഉപേക്ഷിച്ചെങ്കിലും അതേ പശ്ചാത്തലത്തിൽ ആയിരുന്നോ ആഗതൻ എന്ന ദിലീപ് ചിത്രം എടുത്തത് എന്ന് അറിയില്ല. അതേ പോലെ, ഈ ഓറഞ്ച് തോട്ടവും വെള്ളിത്തിരയിൽ കണ്ടാൽ കൊള്ളാം എന്നാഗ്രഹമുണ്ട്  😊)


- ശ്രീ

0 comments: