പുസ്തകം: ശിവഗാമിയുടെ ഉദയം : ബാഹുബലി തുടക്കത്തിനു മുൻപ്
രചയിതാവ് / എഡിറ്റർ : ആനന്ദ് നീലകണ്ഠൻ
പരിഭാഷകന്‍: പി എൻ വേണുഗോപാൽ
വിഭാഗം: നോവൽ
ഭാഷ: മലയാളം
പ്രസാധകർ: പൂർണ്ണ പബ്ലിക്കേഷൻസ്
പേജ്: 560
വില: 299
പുസ്തക പരിചയം:
ബാഹുബലി എന്ന ബ്രഹ്മാണ്ഡ ചിത്രം ഒരുക്കിയ രാജാമൌലിയുടെ വാക്കുകൾ ആവർത്തിച്ചാൽ ബാഹുബലി സൃഷ്ടിച്ചപ്പോൾ വർ ഒരു ധർമ്മ സങ്കടത്തിലായിരുന്നുവത്രെ. മഹിഷ്മതിയുടെ കഥാലോകം വളർന്നുകൊണ്ടിരുന്നുവെന്നും മഹിഷ്മതിയുടെ കഥകൾ ഒരു സിനിമയുടെ എന്നല്ല, രണ്ട് ഭാഗങ്ങളുള്ള സിനിമയിൽ പോലും ഉൾക്കൊള്ളിക്കുവാൻ കഴിയുമായിരുന്നില്ല എന്നുമാണ്.
ആ കഥയിൽ നിന്ന് ഉയർന്നുവന്ന ആകർഷകമായ കഥാലോകത്തെ ഉപേക്ഷിക്കുവാനും അവർക്ക് ആകുമായിരുന്നില്ല. കാരണം ആ കഥയുടെ വരികൾക്കിടയിൽ പതുങ്ങിയിരിക്കുന്ന കഥാപാത്രങ്ങൾ അവരുടെ സ്വന്തം കഥകളുടെ മോക്ഷത്തിനായി കാത്തിരിക്കുന്നുണ്ടായിരുന്നു, അനാവരണം ചെയ്യേണ്ട രഹസ്യങ്ങളുണ്ടായിരുന്നു, രോമാഞ്ചവും ഭയവും ഉളവാക്കുന്ന ഗൂഢാ ലോചനകൾ ഉണ്ടായിരുന്നു.
അങ്ങനെ രസകരമായ കഥകളുടെ പരമ്പരകൾക്കായി മഹിഷ്മതിയുടെ ഭൂതകാലത്തിലേക്ക് വേട്ടയാടാൻ രാജമൌലി എന്ന സംവിധായകൻ ആനന്ദ് നീലകണ്ഠൻ എന്ന വിഖ്യാതനായ എഴുത്തുകാരനെ കൂട്ടു പിടിയ്ക്കുകയായിരുന്നു.
അങ്ങനെ ആണ് ബാഹുബലി 1,2 സിനിമകൾക്കും മുൻപ് നടന്ന കഥകളെ മൂന്ന് ഭാഗങ്ങളായി 'ശിവകാമിയുടെ ഉദയം, ചതുരംഗം, മഹിഷ്മതിയുടെ റാണി' എന്നിങ്ങനെ മൂന്ന് പുസ്തകങ്ങൾ ആക്കിയത്.
രാജ്യദ്രോഹം ചുമത്തപ്പെട്ടു വധിക്കപ്പെട്ട ഒരു ഭുമിപതിയുടെ മകളായ ശിവഗാമിയുടെ അനാഥാലയത്തിൽ നിന്നും അധികാരത്തിലേക്കുള്ള വളർച്ചയാണ് ശിവകാമിയുടെ ഉദയം എന്ന ആദ്യ നോവൽ.
ഉദ്വേഗജനകമായ ഒരുപാട് രംഗങ്ങളുള്ളതാണു ഈ കഥ. ബിജ്ജാല ദേവൻറെ അച്ഛനായ സോമദേവ ഭരിക്കുന്ന കാലത്താണ് ഈ കഥ നടക്കുന്നത്. ഭൂരിഭാഗം കഥാപാത്രങ്ങളെയും നമുക്ക് പരിചയം കാണില്ല എന്ന് അറിയാവുന്നത് കൊണ്ട് ആകും നോവലിന്റെ തുടക്കത്തിലെ മൂന്നാലു പേജുകൾ കഥാപാത്രങ്ങളുടെ ചുരുക്കത്തിലുള്ള പരിചയപ്പെടുത്തലിനു വേണ്ടി മാറ്റി വച്ചിട്ടുണ്ട്. നമ്മളിൽ ഭൂരിഭാഗം പേർക്കും പരിചയമുള്ള കഥാപാത്രങ്ങൾ ആയി ബിജ്ജാല, കട്ടപ്പ, ശിവഗാമി എന്നിങ്ങനെ വിരലിലെണ്ണാവുന്നവർ മാത്രമേ ഈ നോവലിലുള്ളൂ എന്നത് കൊണ്ട് ആകാം ഈ നല്ല തീരുമാനം.
ചതിയും വഞ്ചനയും നിറഞ്ഞ മഹിഷ്മതി സാമ്രാജ്യത്തിൽ രാജ്യദ്രോഹികളും അധികാര മോഹികളും ചെയ്യുന്ന സ്വാർത്ഥതയും ചതി പ്രയോഗങ്ങളും നമുക്കു മുന്നിൽ വെളിവാക്കുന്നുണ്ട് ഈ നോവൽ. ആ കാലഘട്ടത്തിലെ മഹിഷ്മതി സാമ്രാജ്യത്തിൻറെയും ചുറ്റുപാടുമുള്ള ഗൗരീ പർവ്വതത്തിലും സമീപ പ്രദേശങ്ങളിലും നടക്കുന്ന കഥയാണ് ഈ പുസ്തകത്തിൽ പ്രധാനമായും പറയുന്നത്.
ദൈവീകവും പവിത്രമായതുമായി ഏവരും കണക്കാക്കുന്ന ഗൗരീപർവ്വതത്താൽ അനുഗ്രഹിക്കപ്പെട്ട മഹിഷ്മതി സാമ്രാജ്യത്തിലെ പ്രഗത്ഭനായ രാജാവ് സോമദേവയോട് കടുത്ത പകയുമായി ജീവിക്കുകയാണ് ശിവഗാമി. രാജ്യദ്രോഹിയെന്ന് മുദ്രകുത്തപ്പെട്ട് രാജാവിനാൽ ചിത്രവധത്തിനു വിധിയ്ക്കപ്പെട്ട് അതി ഭീകരമായി കൊല ചെയ്യപ്പെട്ട തന്റെ പിതാവിന്റെയും പുറകെ മാതാവിന്റെയും മരണങ്ങൾക്ക് പിന്നിലെ കാരണങ്ങൾ തേടിയിറങ്ങുന്ന ശിവഗാമി, അധികാരത്തിന്റെയും പ്രതികാരത്തിന്റെയും വഞ്ചനയുടെയും ഗൂഢാലോചനയുടെയും ലോകത്തേക്കാണ് എത്തപ്പെടുന്നത്.
ശിവഗാമിയ്ക്കും കട്ടപ്പയ്ക്കും ബിജ്ജാല ദേവനും പുറമെ സോമദേവ രാജൻ, ഹേമവതി റാണി, മഹാദേവ, പരമേശ്വര, രുദ്രഭട്ട, കാളീചരൻ ഭട്ട, സ്കന്ദദാസ, പട്ടരായ, രൂപക, മേഖല, അഖില, ദേവരായ, ഗോമതി, കാദംബരി, തിമ്മ, ഗുണ്ടു രാമു, കാമാക്ഷി, കലിക, കേകി, ബൃഹന്നള, അല്ലി, ആച്ചി നാഗമ്മ, ശിവപ്പ,മലയപ്പ, ഭൂതരായ, ഹിഡുംബ, അക്കുണ്ടരായ, ഗുഹ, ജീമോത, നീലപ്പ, വാമന, ചിത്രവേണി, ശങ്കരദേവ, മാർത്താണ്ഠ, നരസിംഹ, കാർത്തികേയ, തോണ്ടക, ഉത്തുംഗ, രേവമ്മ മുതൽ കാലകേയരും വൈതാളികരും വരെ... അങ്ങനെയങ്ങനെ ഒട്ടനേകം കഥാപാത്രങ്ങളിൽ കൂടി വികസിയ്ക്കുകയാണ് ഈ കഥ.
അനാഥയായി മാറിയ ശിവഗാമിയുടെ നിശ്ചയധാർഢ്യത്തിന്റെയും ഒറ്റപ്പെട്ട പടയൊരുക്കത്തിന്റെയും കഥ പറയുന്ന, മഹിഷ്മതിയുടെ അറിയാക്കഥകൾ വായനക്കാരിലേക്കെത്തിക്കുന്ന ബാഹുബലി സീരീസിലെ ഒന്നാമത്തെ പുസ്തകം ആണ് ശിവഗാമിയുടെ ഉദയം.
- ശ്രീ
