Tuesday, February 1, 2022

കർണൻ [Karnan]


മറാഠി നോവലിസ്റ്റ് ശിവാജി സാവന്തിന്റെ 

മൃത്യുഞ്ജയം എന്ന പ്രശസ്ത നോവലിന്റെ മലയാള പരിഭാഷ ആണ് കർണൻ എന്ന ഈ പുസ്തകം.  മഹാഭാരതത്തെ കർണ പക്ഷത്തു നിന്നും  അവതരിപ്പിയ്ക്കുകയാണ് ഈ പുസ്തകത്തിലൂടെ. 


മഹാഭാരത കഥ നമുക്ക് ഏവർക്കും പരിചിതം ആണെങ്കിലും പ്രധാന കഥയിൽ അപ്രശസ്തർ എന്ന് തോന്നിപ്പിയ്ക്കുന്ന ചിലരെ എങ്കിലും വിശദമായി പരിചയപ്പെടുത്തുന്നുണ്ട്  ഈ നോവൽ.  ഒൻപത് അദ്ധ്യായങ്ങളിലായി കുന്തി, വൃഷാലി,  ദുര്യോധനൻ, കർണൻ, ശോണൻ, ശ്രീകൃഷ്ണൻ എന്നിവരുടെ ചിന്തകളിൽ  വളരെ മികച്ചൊരു വായനാനുഭവം നോവൽ നമുക്ക് തരുന്നു.


കുന്തിയുടെ കുട്ടിക്കാലത്ത് നിന്ന് ആരംഭിച്ച്,  കർണന്റെ ജനനത്തിനു ശേഷം പലരിലൂടെ വികസിയ്ക്കുന്ന നോവൽ മഹാഭരത കഥയെ മറ്റൊരു കോണിലൂടെ,  സാഹചര്യങ്ങളിലൂടെ അവതരിപ്പിചിരിയ്ക്കുകയാണ് ശിവാജി സാവന്ത്. 


മഹാഭരത കഥയിൽ മാറ്റാരെക്കാളും മികച്ച യോദ്ധാവും സേനാ നായകനും ദാനശീലനും ആയിട്ടും ജീവിതത്തിൽ 99 ശതമാനവും ന്യായത്തിനും ധർമ്മത്തിനും ഒപ്പം നിന്നിട്ടും ജീവിതത്തിൽ ഉടനീളം അപമാനവും അവഗണനകളും ഏറ്റുവാങ്ങാൻ വിധിയ്ക്കപ്പെട്ടവൻ ആയിരുന്നു കർണൻ.  


സൂര്യപുത്രൻ ആയിട്ടും സൂതപുത്രൻ ആയി അറിയപ്പെട്ടവൻ... കൗന്തേയൻ ആയിട്ടും രാധേയൻ ആയി അറിയപ്പെട്ടവൻ... കുലമഹിമയുടെ പേരിൽ ഗുരുകുലത്തിലും മത്സര രംഗത്തും സ്വയംവര വേദിയിലും അപമാനിയ്ക്കപ്പെട്ട് മാറ്റി നിർത്തപ്പെട്ടവൻ...!


തന്റെ നിസ്സാഹായതയെ സൗഹൃദത്തിന്റെ മറവിൽ മുതലെടുത്തതാണെങ്കിൽ കൂടി ദുര്യോദനനു കൊടുത്ത വാക്ക് ഒരിയ്ക്കലും തെറ്റിയ്ക്കുന്നില്ല കർണൻ. അതു പോലെ ദാന ധർമ്മങ്ങളിൽ തന്റെ മരണ സമയത്തു പോലും വിസ്മയിപ്പിയ്ക്കുന്നുണ്ട്  ഈ സൂര്യപുത്രൻ. കർണനെ അടുത്തറിഞ്ഞു, ഉപാധികളില്ലാതെ സ്നേഹിയ്ക്കുന്നവരിൽ വൃഷാലി, ശോണൻ എന്നിവരെ കൂടാതെ അശ്വത്ഥാത്മാവ് മാത്രം വേറിട്ട് നിൽക്കുന്നു. അതു പോലെ ഭീഷ്മരും.


 തന്നെ മാറ്റാരെക്കാളും ആരാധിയ്ക്കുന്നുവൻ ആണു കർണൻ എന്ന് തിരിച്ചറിയാവുന്ന ശ്രീകൃഷ്ണൻ പോലും അയാൾ ആരെന്ന് തിരിച്ചറിയുന്നുവെങ്കിൽ പോലും ഒരു പരിധി വരെ പക്ഷപാതപരമായ നിലപാട് ആണ് സ്വീകരിയ്ക്കുന്നത്.


 തന്റെ ജീവിതത്തിൽ ധർമ്മത്തിനെതിരെ കർണ്ണൻ നില കൊള്ളുന്ന ഒരേയൊരു അവസരം പാഞ്ചാലീ വസ്ത്രാക്ഷേപ സന്ദർഭം ആണ്. ആ അവസരത്തിൽ കർണ്ണൻ എടുക്കുന്ന ഒരേയൊരു തെറ്റായ നിലപാട് തന്നെ ആയിരുന്നു അവസാനം  യുദ്ധസമയത്ത് ആയുധമില്ലാതെ നിൽക്കുമ്പോൾ ധർമ്മം പാലിയ്ക്കാൻ തുടങ്ങുന്ന അർജ്ജുനനോട് ആ ദയ കർണ്ണൻ അർഹിയ്ക്കുന്നില്ല എന്ന് കൃഷ്ണനെ കൊണ്ട് പറയിപ്പിയ്ക്കുന്നത് പോലും.


വായനക്കാരുടെ കണ്ണും മനസ്സും ഒരു പോലെ നിറഞ്ഞു കൊണ്ടു മാത്രമേ ഈ നോവൽ വായിച്ചു  അവസാനിപ്പിയ്ക്കാൻ കഴിയൂ എന്നുറപ്പ്.


- ശ്രീ

Saturday, January 1, 2022

കോമ

പുസ്തകം   : കോമ

രചന            : അൻവർ അബ്ദുള്ള

പ്രസാധകർ : ഡിസി ബുക്ക്സ്

പേജ്             : 262

വില               : 280


പുതിയ കാലത്തെ മലയാള കുറ്റാന്വേഷണ നോവൽ രംഗത്ത് ഏറെ ചലനമുണ്ടാക്കിയ സിറ്റി ഓഫ് എം, മരണത്തിന്റെ തിരക്കഥ, കമ്പാർട്ട്മെന്റ്, പ്രൈം വിറ്റ്നസ് എന്നീ പെരുമാൾ സീരീസിന്റെ പുറകെ ഒരു ഇടവേളയ്ക്ക് ശേഷം അൻവർ മാഷ് ന്റെ പുസ്തകം വരുന്നു എന്ന അറിയിപ്പ് കിട്ടിയപ്പോൾ മുതൽ വളരെ ആകാംക്ഷയോടെ തന്നെയാണ് കാത്തിരുന്നത്.


എന്നാൽ പുതിയ പുസ്തകത്തിൽ പെരുമാൾ അല്ല പകരം പുതിയൊരു കഥാപാത്രം ആയ ജിബ്‌രീൽ ആണെന്നറിഞ്ഞപ്പോൾ ചെറിയൊരു നിരാശ തോന്നിയതുമാണ്. എങ്കിലും പെരുമാൾ ആയാലും ജിബ്‌രീൽ ആയാലും രണ്ടിന്റെയും ഉത്ഭവം അൻവർ അബ്ദുള്ള എന്ന ഒന്നാം കിട എഴുത്തുകാരൻ തന്നെ ആണല്ലോ എന്ന് ആശ്വസിച്ചു... 


അങ്ങനെ പുസ്തകം ബുക്ക് ചെയ്ത് കാത്തിരിപ്പായിരുന്നു. അവസാനം രണ്ടു ദിവസം മുൻപ് പുസ്തകം കയ്യിൽ കിട്ടി.  ഇന്നലെയും ഇന്നുമായി വായിച്ചു തീർത്തു.


പ്രതീക്ഷകൾ ഒന്നും അസ്ഥാനത്ത് ആയില്ല എന്നു മാത്രമല്ല, അവസാന അദ്ധ്യായം വരെ സസ്പെൻസിന്റെ മുൾമുനയിൽ ആയിരുന്നു. 


എടുത്തു പറയേണ്ടത് സാധാരണ ഡിറ്റക്റ്റീവ് നോവലുകളിൽ നിന്ന് വ്യത്യസ്തമായി അൻവർ മാഷ് ഉപയോഗിച്ചിരിയ്ക്കുന്ന സാഹിത്യ ഭാഷ ആണ്. ഒരു കുറ്റാന്വേഷണ നോവലിനു ഉണ്ടായിരിയ്ക്കേണ്ട ഉദ്വേഗം ഓരോ പേജിലും നില നിർത്തിക്കൊണ്ടു തന്നെ വളരെ ഭംഗിയായി അത് സാധിച്ചിട്ടുണ്ട്.


മാളവിക എന്ന ഒരു പാവപ്പെട്ട വീട്ടിലെ പെൺകുട്ടിയുടെ അപകട മരണകേസ് കൈകാര്യം ചെയ്തു വരുന്നതിനിടെ ആ കേസ് അതിന്റെ വഴിത്തിരിവിൽ നിൽക്കുമ്പോൾ അത് കൈകാര്യം ചെയ്തു വന്നിരുന്ന സീനിയർ അഡ്വയ്ക്കേറ്റ് പോൾ ഗ്രേഷ്യസ് കൊമ്പശ്ശേരിൽ തന്റെ സ്വന്തം വീട്ടിൽ വച്ചു ഒരപകടത്തിൽ പെടുന്നു... തുടർന്ന് കോമാ അവസ്ഥയിൽ ആകുന്നു. അത് യാദൃശ്ചികമായി നടന്ന ഒരപകടമോ അതോ ഒരു കൊലപാതക ശ്രമമോ ? 


തുടർന്ന് കഥ ഇതിലെ കഥാപാത്രങ്ങളിൽ പലരുടെയും ദുരൂഹമായ ചരിത്രത്തിലൂടെ കടന്നു പോകുകയാണ്. 

പ്രധാന കഥാപാത്രമായ   ഡിറ്റക്റ്റീവ് "ജിബ്രീൽ" എന്ന ഒരു കുറ്റാന്വേഷകനെ  നമുക്ക്  മുന്നിൽ അവതരിപ്പിയ്ക്കുന്നത് കഥയുടെ ആദ്യ ഘട്ടം പിന്നിട്ട ശേഷമാണ്. ചിലപ്പോഴെങ്കിലും ഹോംസ് നെയും പൊയ്റോട്ടിനെയും അനുസ്മരിപ്പിയ്ക്കുന്നുണ്ട് എങ്കിലും

പൊതുവെ വ്യത്യസ്തമായ ഒരു ശൈലി ആണ് ഈ പുതിയ ഡിറ്റക്ടീവിന് ഉള്ളത്. ജിബ്രീൽ ന്റെ താമസ സ്ഥലത്തിന്റെ പേരും അത് വന്ന വഴിയും രസകരമായിട്ടുണ്ട്. 


അവസാന അദ്ദ്ധ്യായം വരെ ഒരു സസ്പെൻസ് നില നിർത്തിക്കൊണ്ട് , ഓരോ കുറ്റകൃത്യത്തിനും പുറകിൽ ഓരോ ചരിത്രം ഉണ്ടെന്നും ഒന്നും ആ നിമിഷത്തിൽ മാത്രം ആരംഭിയ്ക്കുന്നത് അല്ല എന്നും കോമാ എന്ന നോവൽ നമുക്ക് കാണിച്ചു തരുന്നു.


പേഴ്സണലി ജിബ്‌രീൽ നേക്കാൾ മനം കവർന്നത് വിക്ടർ ബാനർജി എന്ന കഥാപാത്രം ആയിരുന്നു.


- ശ്രീ

Thursday, December 2, 2021

ഹാഫ് ഗേൾഫ്രൻഡ്

പുസ്തകം : ഹാഫ്  ഗേൾഫ്രണ്ട്

രചന            : ചേതൻ ഭഗത്

പ്രസാധകർ : ഡിസി ബുക്ക്സ്

പേജ്             : 292

വില               : 200


എല്ലായ്പോഴും പുസ്തകത്തിന്റെ പേരുകൾ കൊണ്ട് വായനക്കാരെ ആകർഷിയ്ക്കാൻ ഒരു പ്രത്യേക കഴിവുണ്ട് ചേതൻ ഭഗത്തിന്. ഈ പുസ്തകവും വ്യത്യസ്ഥമല്ല. "ഹാഫ് ഗേൾഫ്രൻഡ്!" അതെന്താണ് അങ്ങനെ ഒരു പേര് എന്ന ആകാംക്ഷ നമ്മൾ വായനക്കാർക്ക് തുടക്കം മുതലേ ഉണ്ടാകുമെന്നുറപ്പാണ്. അതു പോലെ വളരെ അനായാസമായി കഥയിൽ ലയിച്ചിരുന്നു പെട്ടെന്ന് വായിച്ചു തീര്ക്കാൻ നമ്മെ പ്രേരിപ്പിയ്ക്കാൻ ഈ കഥയിലും കഥാകൃത്തിനു കഴിഞ്ഞിട്ടുണ്ട്.


മാധവ്... റിയ... ഇവരുടെ കഥയാണ് ഇത്. തന്നെ എറ്റവും പിന്നോക്കാവസ്ഥയിൽ നിൽക്കുന്ന  ബീഹാറിലെ ഒരു ദാരിദ്ര രാജ കുടുംബാഗം  ആയ മാധവും ഹൈ ക്ലാസുകാരുടെ ദില്ലിയിൽ നിന്നും വന്ന റിയയും  തമ്മിലുള്ള ഊഷ്മളമായ ബന്ധത്തിന്റെ കഥയാണ് ഹാഫ് ഗേൾ ഫ്രൻഡ്. ഇംഗ്ലീഷ് നന്നായി പറയൻ അറിയാത്ത, ബാസ്കറ്റ് ബോൾ പ്ലെയർ ആയ മാധവ് ഝാ കോളേജിലെ ബാസ്കറ്റ് ബോൾ കോർട്ടിൽ വച്ചാണ് മറ്റൊരു പ്ലെയർ ആയ റിയാ സോമാനിയെ ആദ്യമായി കണ്ടു മുട്ടുന്നത്. പിന്നീട് ആ പരിചയം അടുത്ത സൗഹൃദമായി മാറുന്നു.


വൈകാതെ പിരിയുവാൻ ആകാത്ത വിധം മാധവിന് റിയ യോട് പ്രണയം തോന്നുന്നു. ഇക്കാര്യം സൂചിപ്പിയ്ക്കുമ്പോൾ ചില നിബന്ധനകളോടെ താൻ അവന്റെ "ഹാഫ് ഗേൾ ഫ്രൻഡ്" ആകാൻ തയ്യാറാണ് എന്നു റിയ അറിയിയ്ക്കുന്നു.


ഗാഢമായ ആ ബന്ധത്തിന് എങ്ങനെ വിള്ളൽ വീഴുന്നു എന്നും    അവർ എങ്ങനെ വേർപിരിയുന്നു എന്നും എല്ലാം തുടർന്ന് വരുന്ന ഭാഗങ്ങൾ നമ്മോട് പറയുന്നു.


റിയായുടെ അപ്രതീക്ഷിതമായ വിവാഹത്തോടെ എന്നന്നേയ്ക്കുമായി നഷ്ടപ്പെട്ടെന്ന് തോന്നുന്ന  ആ ബന്ധം പിന്നീട് ഒന്നൊന്നര വർഷങ്ങൾക്ക് ശേഷം വ്യത്യസ്തമായ ഒരു സാഹചര്യത്തിൽ ചുറ്റുപാടുകളിൽ വീണ്ടും പുനരാരംഭിയ്ക്കുന്നു. ഡൽഹിയിൽ വലിയ ശമ്പളം കിട്ടുന്ന നല്ലോരു ബാങ്ക് ജോലി ഉപേക്ഷിച്ചു നാട്ടിലെ ദരിദ്രമായ, തന്റെ അമ്മ നടത്തുന്ന സ്കൂളിന്റെ ആവശ്യങ്ങൾക്കായി പ്രവർത്തിച്ചു വരികയായിരുന്നു അപ്പോൾ മാധവ്. റിയ ആകട്ടെ, വിവാഹ ബന്ധവും കുടുംബ ബന്ധവും ഉപേക്ഷിച്ചു സ്വന്തം നിലയ്ക്ക് ഒരു ജോലിയുമായി പാട്ന യിൽ എത്തിപ്പെടുകയാണ്.


 റിയയുടെ ചില നിബന്ധനകളോടെ വീണ്ടും ഇരുവരുടെയും സൗഹൃദം പൂത്ത്‌ തളിർക്കുന്നു... പക്ഷെ വീണ്ടും ഒരിയ്ക്കൽ കൂടി ജീവിതത്തിലെ എറ്റവും സന്തോഷപ്രദമായ ഒരു അവസരത്തിൽ (മൈക്രോസോഫ്ട് ഫൌണ്ടേഷനും ബിൽഗേറ്റ്സും എല്ലാം ഇവിടെ കഥാപാത്രമാകുന്നുണ്ട്) ഒരു കത്തും എഴുതി വച്ചു റിയ അപ്രത്യക്ഷമാകുന്നു. റിയയെ എന്നന്നേക്കുമായി നഷ്ടപ്പെട്ട മാധവ് പൂർണ്ണമായും തകർന്നു പോകുകയാണ്.


യാദൃശ്ചികമായി കിട്ടിയ അവളുടെ പഴകിയ ഡയറിക്കുറിപ്പുകൾ ഇഷ്ട എഴുത്തുകാരൻ ചേതൻ ഭഗത്തിനെ നിർബന്ധപൂർവ്വം ഏൽപ്പിച്ചു, റിയയുടെ ഓർമ്മകളിൽ മാത്രം ഒതുങ്ങിക്കൂടി മാധവ് യാത്രയാകുന്നു. ആ ഡയറിയിൽ എന്താണെന്ന് തനിയ്ക്ക് അറിയില്ല എന്നും എന്നന്നേയ്ക്കുമായി നഷ്ടപ്പെട്ട അവളുടെ കുറിപ്പുകൾ വായിയ്ക്കാനോ നശിപ്പിയ്ക്കാനോ തനിയ്ക്ക് കരുത്തില്ലെന്നും എഴുത്തിനു ഉപകാരപ്പെടുമെങ്കിൽ ഉപയോഗിയ്ക്കാമെന്നും  അതല്ലെങ്കിൽ നശിപ്പിച്ചു കളഞ്ഞു കൊള്ളാനും അയാൾ പോകുമ്പോൾ അറിയിയ്ക്കുന്നു.

      

ആദ്യം താല്പര്യത്തോടെ അല്ലെങ്കിലും പഴകി പൊടിഞ്ഞു തുടങ്ങിയ ആ ഡയറിയിലെ വായനായോഗ്യമായ ഏതാനും താളുകൾ വായിയ്ക്കുന്ന ചേതൻ ഭഗത്ത് ഉടനെ തന്നെ മാധവിനെ വിളിച്ചു വരുത്തുന്നു... 


 യഥാർത്ഥത്തിൽ റിയ എന്തായിരുന്നു എന്നതിൻ്റെ ഉത്തരം അവൾ എഴുതിയിരുന്ന ഡയറി ആയിരുന്നു. അവളുടെ മനസ്സായിരുന്നു ആ ഡയറി. 


തുടർന്ന് വായനക്കാർക്കും ഉദ്വേഗം ജനിപ്പിക്കുന്ന കഥാഭാഗങ്ങൾ സമ്മാനിയ്ക്കുന്ന നോവൽ ഒരേ സമയം ദേഷ്യവും സ്നേഹവും  റിയയോട് നമുക്ക് തോന്നിപ്പിയ്ക്കുന്നുണ്ട്.


 അവസാനം ഒരുപാട് അലച്ചിലിനും അന്വേഷണങ്ങൾക്കും ഒടുവിൽ ശുഭപര്യവസായിയായി കഥ തീരുമ്പോൾ വായനക്കാരെയും തൃപ്തരാക്കാൻ ഈ നോവലിനു കഴിയുന്നുണ്ട്.   


- ശ്രീ